ສີລັງກາຊອກຫາເງິນທຶນ 5 ຕື້ໂດລາ ເພື່ອທີ່ຈະນໍາເຂົ້າສິນຄ້າຕ່າງໆທີ່ຈຳເປັນໃນການດຳລົງຊີວິດຂອງປະຊາຊົນ.
ໃນວັນພະຫັດ ທີ 2 ພຶດສະພາ ທີ່ຜ່ານມາ ສຳນັກງານນາຍົກລັດຖະມົນຕີຂອງສີລັງກາໄດ້ລະບຸວ່າ: ສີລັງກາ ກຳລັງຊອກຫາແຫຼ່ງເງິນທຶນປະມານ 5 ຕື້ໂດລາ ເພື່ອຈ່າຍເງິນໃນການນໍາເຂົ້ານໍ້າມັນເຊື້ອໄຟ ແລະ ສິນຄ້າອື່ນໆທີ່ຈຳເປັນ ທີ່ຊື້ຜ່ານວົງເງິນສິນເຊື່ອ ແລະ ຫາອີກ 1 ຕື້ໂດລາ ເພື່ອສະໜັບສະໜູນຄັງສຳຮອງຂອງປະເທດ.
ມາຮອດປັດຈຸບັນ, ສີລັງກາ ໄດ້ຮັບວົງເງິນສິນເຊື່ອທີ່ມີມູນຄ່າ 1,5 ຕື້ໂດລາ ຈາກອິນເດຍສຳລັບຊື້ນ້ຳມັນເຊື້ອໄຟ ແລະ ການນຳເຂົ້າສິ່ງຂອງທີ່ຈຳເປັນ, ເຊິ່ງຍັງຢູ່ໃນການເຈລະຈາກັບປະເທດເພື່ອນບ້ານ ສໍາລັບວົງເງິນສິນເຊື່ອອີກ 500 ລ້ານໂດລາ ເພື່ອສະໜອງທຶນໃນການນໍາເຂົ້ານໍ້າມັນເຊື້ອໄຟ.
ສີລັງກາຍັງຄົງຮ້ອງຂໍໃຫ້ປະເທດອື່ນໆຊ່ວຍເຫຼືອ ລວມທັງຍີ່ປຸ່ນ ທີ່ມີສາຍພົວພັນທາງການຄ້າທີ່ມີມາແຕ່ດົນນານ.