ນາງ ມາລາ ຈັນທະລັກສາ ແລະ ນາງ ພິກສະໄໝ ອິນສຸມັງ ສອງສາວນັກກິລາໂວວີນາມທີມຊາດລາວ ປະເພດຟ້ອນປະກອບອຸປະກອນຄູ່ຍິງ ສ້າງຜົນງານໄດ້ຢ່າງໂດດເດັ່ນດ້ວຍການຄວ້າຫຼຽນຄຳທຳອິດ ໃຫ້ກັບທັບນັກກິລາລາວ ໃນງານມະຫະກຳກິລາຊີເກມ ຄັ້ງທີ 31 ໄດ້ສຳເລັດ.
ສຳລັບການແຂ່ງຂັນກິລາໂວວີນາມ ປະເພດຟ້ອນປະກອບອຸປະກອນຄູ່ຍິງ ຮອບຊີງຫຼຽນຄຳ ໄດ້ມີຂຶ້ນໃນຕອນບ່າຍວັນທີ 19 ພຶດສະພາ 2022 ໂດຍມີນັກກິລາຈາກ 5 ຊາດ ລົງທຳການແຂ່ງຂັນ ປະກອບມີ: ສປປ ລາວ, ມຽນມາ, ໄທ ກຳປູເຈຍ ແລະ ຫວຽດນາມ ເຈົ້າພາບ.
ຜ່ານການແຂ່ງຂັນຜົນປະກົດວ່າ ສອງນັກກິລາໂວວີນາມສາວລາວ ເຮັດຄະແນນລວມໄດ້ 269 ຄະແນນ ເປັນອັນດັບ 1 ຄວ້າຫຼຽນຄຳ ທຳອິດ ໃຫ້ກັບທັບນັກກິລາລາວ ໄດ້ສຳເລັດ. ສ່ວນຫຼຽນເງິນ ນັກກິລາຫວຽດນາມ ແລະ ຫຼຽນທອງ ນັກກິລາກຳປູເຈຍ.
ໂດຍ: ສົງການ ພັນແພງດີ