ຕາມການລາຍງານຂອງສຳນັກຂ່າວ ຣອຍເຕີ ໄດ້ລາຍງານວ່າ: ຜົນການເລືອກຕັ້ງທີ່ບໍ່ເປັນທາງການຈາກ ຟີລິບປິນ ໄດ້ລະບຸວ່າ ເຟີດິນານ ມາກອດສ ຈູເນຍ ອາຍຸ 64 ປີ ລູກຊາຍຂອງຜູ້ນຳຜະເດັດການ “ເຟີດິນານ ມາກອສ” ທີ່ຖືກໂຄ່ນລົ້ມອຳນາດເມື່ອປີ 1986 ໄດ້ຊະນະໃນການເລືອກຕັ້ງປະທານາທິບໍດີໃນວັນຈັນນີ້.
ລູກຂອງອະດີດທ່ານຜູ້ນຳໄດ້ຮູ້ຈັກກັນໃນນາມ “ບອງບອງ” ເຊິ່ງຊະນະໃນຄະແນນ 27.5 ລ້ານຄະແນນສຽງ ທີ່ສູງຫຼາຍກວ່າລະດັບ, ເປັນການກັບມາສູ່ອຳນາດໃນຮອບ 36 ປີ ສຳລັບຕະກູນ ມາກອສ ເຊິ່ງໄດ້ໄປລີ້ໄພຢູ່ຕ່າງປະເທດໄລຍະໜຶ່ງ ຫຼັງເຫດການປະຕິວັດຂອງພະລັງປະຊາຊົນ.
ຄະນະກຳມະການ ການເລືອກຕັ້ງຟີລິບປິນ ໄດ້ລະບຸວ່າ ຫຼັງນັບຄະແນນໄດ້ 93.8% ແລ້ວ, ມາກອສ ຈູເນຍ ໄດ້ຄະແນນສຽງຢ່າງບໍ່ເປັນທາງການປະມານ 29.9 ລ້ານຄະແນນສຽງ ເຊິ່ງສູງກວ່າ ເລນີ ໂຣເບຣໂດ ຄູ່ແຂ່ງທີ່ປັດຈຸບັນດຳລົງຕຳແໜ່ງຮອງປະທານາທິບໍດີ ສູງເຖິງ 2 ເທົ່າ ໂດຍມີຜູ້ອອກມາໃຊ້ສິດໃນການເລືອກຕັ້ງນີ້ເຖິງ 80%.
ຜົນການນັບຄະແນນຢ່າງເປັນທາງການ ອາດຈະມີການປະກາດອອກມາໃນຊ່ວງທ້າຍເດືອນນີ້.
ສຳລັບຕະກູນນີ້ ທີ່ຖືກໂຄ່ນລົ້ມຕຳແໜ່ງ ແລ້ວໄປລີ້ໄພຢູ່ຕ່າງປະເທດ ກ່ອນທີ່ຈະກັບມາຊ່ວງປີ ຄສ 90 ແລະ ໄດ້ກັບມາໃນວົງການ ການເມືອງຟີລິບປິນ.
ກ່ອນຈະມາລົງເລືອກຕັ້ງໃນເທື່ອນີ້ ມາກອດສ ຈູເນຍ ເຄີຍເປັນສະມາຊິກສະພາຜູ້ແທນລາຊະດອນ ແລະ ວຸດທິສະມາຊິກ, ອີມີ ມາກອສ ຜູ້ເປັນເອື້ອຍຍັງເປັນວຸດທິສະມາຊິກຢູ່ ໃນຂະນະທີ່ ອິເມວດາ ມາກອສ ຜູ້ເປັນແມ່ ແລະ ພັນລະຍາໝ້າຍຂອງອະດີດທ່ານຜູ້ນຳ ມາກອສ ຍັງເປັນຜູ້ທີ່ມີອິດທິພົນທາງການເມືອງຢູ່ ຫຼັງເຮັດໜ້າທີ່ເປັນສະມາຊິກຜູ້ແທນລາຊະດອນເຖິງ 4 ສະໄໝ.
ແຫຼ່ງຂ່າວຈາກ ຣອຍເຕີ