ປະທານາທິບໍດີ ບາຣັກ ໂອບາມາ ແຫ່ງສະຫະລັດ ກຽມຂໍສະພາຜູ້ແທນອະນຸມັດງົບເພີ່ມ 3,2 ຕື້ໂດລາ ໃນມື້ນີ້
(7 ພະຈິກ) ເພື່ອໃຊ້ໃນສົງຄາມຕ້ານກຸ່ມ IS ໃນອີຣັກ ແລະ ຊີເຣຍ.
ສຳນັກຂ່າວຕ່າງປະເທດລາຍງານໃນວັນທີ 7 ພະຈິກນີ້ວ່າ ປະທານາທິບໍດີຂອງສະຫະລັດ ຈະນຳໃຊ້ງົບປະມານຈຳ
ນວນດັ່ງກ່າວ ເພື່ອເປັນທຶນໃນການເຝິກທະຫານ ແລະ ຕິດອາວຸດໃຫ້ແກ່ ກອງກຳລັງຄວາມໝັ້ນຄົງຂອງອີຣັກ
ແລະ ຊື້ລະເບີດທົດແທນ ຫລັງຈາກທີ່ໄດ້ສົ່ງເຮືອບິນເຂົ້າໄປທຳລາຍເປົ້າໝາຍໃນອີຣັກ ແລະ ຊີເຣຍຢ່າງຕໍ່ເນື່ອງ
ຫລາຍອາທິດຜ່ານມາເຊິ່ງປະຕິບັດການໂຈມຕີທາງອາກາດດັ່ງກ່າວ ມີຜູ້ບັນຊາການທະຫານຫລາຍຄົນ ໄດ້ເຕືອນ
ວ່າ ອາດຈະໃຊ້ເວລາຫລາຍປີເຊິ່ງເປັນການສົ່ງເຮືອບິນອອກໄປປະຕິບັດການຫລາຍພັນຖ້ຽວ ແລະ ຖິ້ມລະເບີດ
ໃສ່ເປົ້າໝາຍຫລາຍຮ້ອຍຄັ້ງ ເຮັດໃຫ້ອາເມຣິກາຕ້ອງສູນເສຍງົບ ປະມານ 8,300,000 ໂດລາສະຫະລັດຕໍ່ມື້ ໂດຍ
ນັກວິເຄາະບາງຄົນກໍໄດ້ເວົ້າວ່າ ຕົວເລກໃນຕົວຈິງອາດຈະສູງກ່ວານັ້ນອີກ.
ຂໍ້ມູນຈາກກະຊວງປ້ອງກັນປະເທດຂອງສະຫະລັດ ໄດ້ລະບຸວ່າ ສົງຄາມທາງອາກາດຕ້ານກຸ່ມ IS ໄດ້ເຮັດໃຫ້ສະຫະ
ລັດອາເມຣິກາ ສູນເສຍງົບປະມານໄປແລ້ວເຖິງ 580 ລ້ານໂດລາ ນັບຕັ້ງແຕ່ວັນທີ 16 ຕຸລາ 2014 ເປັນຕົ້ນມາ.
ສຳລັບງົບປະມານໃໝ່ທີ່ ໂອບາມາ ຮຽກຮ້ອງຈະນຳໄປຈ່າຍເປັນຄ່າແຮງງານຂອງທີ່ປຶກສາທະຫານ ຈຳນວນ 600
ຄົນ ເຊິ່ງຈະຖືກສົ່ງໄປຊ່ວຍເຝິກທະຫານອີຣັກ ແລະ ກອງກຳລັງຊາວເຄີດທີ່ເມືອງ ອາບິນ ແລະ ນອກຈາກນັ້ນ ຍັງ
ມີທະຫານອາເມຣິກາອີກປະມານ 800 ຄົນ ທີ່ຄຸ້ມກັນສະຖານທູດສະຫະລັດ ແລະ ສະໜາມບິນແບັກແດັດ.
