ສຳນັກຂ່າວ ເອພີ ໄດ້ລາຍງານວ່າ: ປະຊາຊົນຊຸດທຳອິດໄດ້ຮັບການຊ່ວຍເຫຼືອອອກມາຈາກໂຮງງານເຫຼັກໃນເມືອງມາລິອູໂພລ ຢູເຄຣນ ເຊິ່ງເປັນຖານທີ່ໝັ້ນສຸດທ້າຍຂອງນັກຮົບຢູເຄຣນ, ພາຍໃຕ້ການປິດລ້ອມຂອງກອງທັບຣັດເຊຍ ແລະ ໄດ້ຮັບການນຳຕົວໄປສົ່ງຍັງສະຖານທີ່ປອດໄພແລ້ວໃນວັນຈັນທີ່ຜ່ານມາ.
ໃນວັນອາທິດຜ່ານມານີ້, ຈາກວິດີໂອທີ່ໄດ້ມີການເຜີຍແຜ່ໂດຍກອງທັບຢູເຄຣນ ແລະ ຣັດເຊຍ ສະແດງໃຫ້ເຫັນເຖິງປະຊາຊົນຫຼາຍກວ່າ 100 ຄົນ ລວມທັງຜູ້ຍິງສູງອາຍຸ ແລະ ຜູ້ຍິງຫຼາຍຄົນທີ່ມີເດັກນ້ອຍຍ່າງຂື້ນລົດເມ ແລະ ລົດໂຮງໝໍເພື່ອເດີນທາງອອກຈາກໂຮງງານເຫຼັກ ອໍຊັອບສະຕານ (Azovstal) ທີ່ຖືກໂຈມຕີໃນຊ່ວງຫຼາຍມື້ທີ່ຜ່ານມາ.
ເຈົ້າໜ້າທີ່ໄດ້ລະບຸວ່າ: ປະຊາຊົນຈະຖືກນຳຕົວໄປສົ່ງທີ່ເມືອງຊາໂປຣິດສເຊຍ (Zaporizhzhia) ເຊິ່ງຫ່າງອອກໄປທາງຕາເວັນຕົກສຽງເໜືອປະມານ 230 ກິໂລແມັດ, ເຖິງຢ່າງໃດກໍຕາມກອງທັບຣັດເຊຍໄດ້ລະບຸວ່າ ມີຜູ້ອົບພະຍົບບາງສ່ວນທີ່ຖືກນຳຕົວໄປສົ່ງທີ່ບ້ານແຫ່ງໜຶ່ງເຊິ່ງຢູ່ພາຍໃຕ້ກຸ່ມແບ່ງແຍກດິນແດນທີ່ມີຣັດເຊຍໜູນຫຼັງ ໂດຍຢືນຢັນວ່າ ພວກເຂົາເລືອກທີ່ຈະຢູ່ກັບກຸ່ມແບ່ງແຍກດິນແດນ, ຂະນະທີ່ຜູ້ອົບພະຍົບສ່ວນຫຼາຍຕ້ອງການເດີນທາງໄປເມືອງທີ່ຢູເຄຣນຍັງຄອບຄອງຢູ່.
ກ່ອນໜ້ານີ້ ທາງການຢູເຄຣນໄດ້ກ່າວຫາວ່າ ທະຫານຣັດເຊຍພະຍາຍາມນຳຕົວປະຊາຊົນກັບໄປຣັດເຊຍ ຫຼື ເມືອງທີ່ຣັດເຊຍຄອບຄອງຢູ່ ເຖິງວ່າຜູ້ອົບພະຍົບເຫຼົ່ານັ້ນບໍ່ຕ້ອງການກໍຕາມ ແຕ່ລັດຖະບານຣັດເຊຍອອກມາປະຕິເສດຂໍ້ກ່າວຫານີ້.
ຫາກການອົບພະຍົບປະຊາຊົນອອກຈາກໂຮງງານເຫຼັກແຫ່ງນີ້ປະສົບຄວາມສຳເລັດ ຈະຖືວ່າເປັນຄວາມກ້າວໜ້າທີ່ສຳຄັນຂອງການປະຕິບັດການດ້ານມະນຸດສະທຳຂອງສົງຄາມໃນຢູເຄຣນລ່ວງເລີຍມາ 10 ອາທິດ, ຫຼັງຈາກທີ່ຄວາມພະຍາຍາມຈັດເສັ້ນທາງອົບພະຍົບອອກຈາກເມືອງອອກຈາກເມືອງມາລິອູໂພລຫຼາຍເທື່ອທີ່ຜ່ານມາປະສົບຄວາມລົ້ມເຫຼວ ໂດຍເຈົ້າໜ້າທີ່ຢູເຄຣນກ່າວຫາທະຫານຣັດເຊຍວ່າ ຍັງຄົງໂຈມຕີໃສ່ເສັ້ນທາງອົບພະຍົບດັ່ງກ່າວ.
ສະຫະປະຊາຊາດ ແລະ ຄະນະກຳມະການກະຊາຊາດລະຫວ່າງປະເທດ ເປັນຜູ້ດູແລພາລະກິດອົບພະຍົບປະຊາຊົນອອກຈາກໂຮງງານອໍຊັອບສະຕານໃນມື້ພັກທ້າຍອາທິດທີ່ຜ່ານມາ ພາຍໃຕ້ຂໍ້ຕົກລົງການຢຸດຍິງຊົ່ວຄາວ ໂດຍເຊື່ອວ່າມີປະຊາຊົນປະມານ 1,000 ຄົນ ຍັງຕິດຢູ່ໃນໂຮງງານຂະໜາດໃຫຍ່ແຫ່ງນີ້ ລວມທັງທະຫານຢູເຄຣນອີກປະມານ 2,000 ຄົນ ທີ່ຫຼົບລີ້ຢູ່ຕາມໂຄງອຸໂມງ ແລະ ເສັ້ນທາງລັບທີ່ສະລັບຊັບຊ້ອນພາຍໃນໂຮງງານເຫຼັກແຫ່ງນີ້ເຊິ່ງຕົກຢູ່ໃນວົງລ້ອມຂອງທະຫານຣັດເຊຍ.
ເມືອງມາລິອູໂພລເປັນໜຶ່ງໃນສະຖານທີ່ ທີ່ຖືກທະຫານຣັດເຊຍໂຈມຕີຢ່າງໜັກຕະຫຼອດຫຼາຍອາທິດ ໂດຍຄາດວ່າຍັງມີປະຊາກອນອາໄສຢູ່ເມືອງແຫ່ງນີ້ປະມານ 100,000 ຄົນ ຈາກທັງໝົດ 400,000 ຄົນ ກ່ອນທີ່ຈະເກີດສົງຄາມປະຊາຊົນຈຳນວນຫຼາຍປະສົບກັບບັນຫາຂາດແຄນອາຫານ, ນ້ຳດື່ມ, ຢາ ແລະ ເຄື່ອງເຮັດຄວາມຮ້ອນ ໃນທ່າມກາງເສດອາຄານທີ່ເສຍຫາຍຈາກການໂຈມຕີຂອງຣັດເຊຍ.
ປະທານາທິບໍດີຢູເຄຣນ ໂວໂລດິເມຍ ເຊເລນສະກີ (Volodymyr Zelenskyy) ກ່າວສະແດງຄວາມຫວັງ ວ່າຈະສາມາດອົບພະຍົບປະຊາຊົນອອກຈາກເມືອງແຫ່ງນີ້ໄດ້ຫຼາຍຂື້ນໃນວັນຈັນ ແລະ ພົນລະເມືອງທີ່ຕິດຄ້າງຢູ່ໃນໂຮງງານເຫຼັກອໍຊັອບສະຕານ ຢ້ານວ່າຈະຖືກນຳຕົວຂຶ້ນລົດເມເພື່ອໄປສົ່ງຢູ່ເມືອງ ເຊິ່ງຢູ່ພາຍໃຕ້ການຄອບຄອງຂອງຣັດເຊຍ ຫຼື ກຸ່ມແບ່ງແຍກດິນແດນ.
ໂດຍປະທານາທິບໍດີຢູເຄຣນ ໄດ້ລາຍງານວ່າ ຍັງມີການໂຈມຕີໃສ່ໂຮງງານເຫຼັກແຫ່ງນັ້ນຢ່າງຕໍ່ເນື່ອງໃນວັນອາທິດ ເຖິງວ່າຈະມີຂໍ້ຕົກລົງຢຸດຍິງຊົ່ວຄາວກໍຕາມ.
ເດນິດສ ຊະເລກາ ຜູ້ບັນຊາການກອງພັນທີ 12 ແຫ່ງກອງກຳລັງເນຊັ່ນແນວ ຂອງຢູດເຄຣນໃຫ້ສຳພາດທາງໂທລະທັດວ່າ: ຍັງມີປະຊາຊົນຫຼາຍຮ້ອຍຄົນ ແລະ ຍັງມີເດັກນ້ອຍອີກຫຼາຍຄົນຕິດຢູ່ໃນຫຼຸມລົບໄພໃນໂຮງງານແຫ່ງນັ້ນ ລວມທັງທະຫານທີ່ໄດ້ຮັບບາດເຈັບເກືອບ 500 ຄົນ ແລະ ຕາຍອີກຈຳນວນຫຼາຍ.