ບໍລິສັດ ພະລັງງານແສງຕາເວັນ ຈຳກັດ ຊຶ່ງເປັນບໍລິສັດຂອງນັກທຸລະກິດແຫ່ງ ສປ ຈີນ ໂດຍມີທີ່ຕັ້ງຢູ່ບ້ານໜອງ
ສະໂນຄຳ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ເຂົ້ານຳສະເໜີຈຸດດີ, ຂໍ້ສະດວກຂອງການນຳໃຊ້ພະລັງງານ
ໄຟຟ້າແສງຕາເວັນ ເປັນໄຟເຍືອງທາງ ໃນເທສະບານແຂວງວຽງຈັນ ເນື່ອງຈາກເປັນພະລັງງານສະອາດ, ປະຢັດ,
ສະດວກ ແລະ ປອດໄພ ຂະນະທີ່ອົງການປົກຄອງແຂວງ ສະເໜີໃຫ້ບໍລິສັດດັ່ງກ່າວອອກແບບລາຍລະອຽດເປັນຫຼາຍ
ຮູບແບບ ໃຫ້ກົມກືນເຂົ້າກັບເທສະບານແຂວງ, ຄິດໄລ່ລາຄາ ແລະ ສະເໜີຕໍ່ອົງການປົກຄອງແຂວງອີກເທື່ອໜຶ່ງ
ກ່ອນກ້າວສູ່ການເຊັນ MOU.
ໃນແລງວັນທີ 3 ພະຈິກທີ່ຜ່ານມາ ຢູ່ຫ້ອງວ່າການປົກຄອງແຂວງວຽງຈັນ ທ່ານ ວູເວິຍ ອຳນວຍການບໍລິສັດໄຟຟ້າ
ແສງຕາເວັນຈຳກັດ ໄດ້ເຂົ້ານຳສະເໜີຈຸດດີ ແລະ ຂໍ້ສະດວກຂອງການນຳໃຊ້ໄຟຟ້າແສງຕາເວັນເປັນໄຟຟ້າເຍືອງ
ທາງເທສະບານແຂວງວຽງຈັນຕໍ່ທ່ານ ຄຳເມິງ ພົງທະດີ ເຈົ້າແຂວງໆວຽງຈັນວ່າ: ເນື່ອງຈາກການນຳໄຟຟ້າລະບົບນີ້
ບໍ່ໄດ້ຈ່າຍຄ່າກະແສການຕິດຕັ້ງກໍສະດວກບໍ່ໄດ້ໃຊ້ສາຍ, ບໍ່ສ່ຽງຕໍ່ການເກີດອັກຄີໄຟ, ລະບົບໄຟຟ້າຂອງບໍລິສັດຕົນ
ແມ່ນຜະລິດຈາກປະເທດຈີນປະກອບດ້ວຍ:ເສົາ, ແຜ່ນຮັບແສງ, ໝໍ້ໄຟ, ດອກໄຟ ແລະ ກ່ອງຄວບຄຸມ.
ອຸປະກອນທັງໝົດມີການເຮັດວຽກຄື: ເສົາເຮັດໜ້າທີ່ຢຶດໃຫ້ມີການຊົງຕົວຕາມທີ່ຕ້ອງການ, ແຜ່ນຮັບແສງເຮັດ
ໜ້າທີ່ຮັບເອົາແສງ ແລ້ວສາກໄຟເກັບມ້ຽນໄວ້ໃນໝໍ້ໄຟ ແລະ ໝໍ້ໄຟເຮັດໜ້າທີ່ປ່ອຍໄຟໃຫ້ດອກໄຟ ເພື່ອສົ່ງແສງ
ສະຫວ່າງອອກ ແລະ ກ່ອງຄວບຄຸມເຮັດໜ້າທີ່ສັ່ງປິດເປີດ ແລະ ຄວາມສະຫວ່າງຂອງດອກໄຟ ຊຶ່ງເຕັກນິກໄຟຟ້າ
ຂອງບໍລິສັດມີຄວາມຮັບປະກັນສ້ອມແປງ, ປ່ຽນຖ່າຍໃຫ້ໂດຍບໍ່ເສຍຄ່າໃນກໍລະນີເປ່ເພເປັນເວລາສອງປີ, ດອກໄຟ
ສາມາດໃຊ້ງານໄດ້ 50 ພັນຊົ່ວໂມງ ແລະ ອຸປະກອນທັງໝົດ 5 ປີ ຈິ່ງມີການບຳລຸງຮັກສາ 1 ຄັ້ງ, ແຕ່ຫາກມີການບົວ
ລະບັດທີ່ຖືກຕ້ອງອຸປະກອນທຸກຢ່າງອາດໃຊ້ງານໄດ້ຮອດ 10 ປີ, ສ່ວນອາຍຸການໃຊ້ງານຂອງເສົາແມ່ນຍາວກວ່ານັ້ນ,
ອຸປະກອນ ຫຼື ອາໄຫຼທັງໝົດອີກ 10 ປີຂ້າງໜ້າຍັງມີການຜະລິດ ແລະ ຈຳໜ່າຍ ເພື່ອແຮໄວ້ໃນກໍລະນີເປ່ເພ.
ທ່ານກ່າວຕໍ່ອີກວ່າ: ບໍລິສັດຂອງຕົນໄດ້ຮັບການອະນຸຍາດໃຫ້ສ້າງຕັ້ງຂຶ້ນ ແຕ່ປີ 2010 ເປັນຕົ້ນມາ ແລະ ໄດ້ຕິດຕັ້ງ
ໄຟຟ້າເຍືອງທາງດ້ວຍລະບົບນີ້ຢູ່ນະຄອນຫຼວງວຽງຈັນ, ໄຊຍະບູລີ ແລະ ແຂວງອຸດົມໄຊມາແລ້ວ.
ເບື້ອງທ່ານ ຄຳເມິງ ພົງທະດີ ກໍສະເໜີໃຫ້ບໍລິສັດພະລັງງານແສງຕາເວັນອອກແບບຕົວຈິງ 23 ແບບໃຫ້ມີຄວາມ
ກົມກືນກັບເທສະບານແຂວງ ແລະ ມີຄວາມສວຍງາມ, ໃຫ້ຄິດໄລ່ມູນຄ່າລາຄາການກໍ່ສ້າງ ແລະ ໃຫ້ສົມທຽບໃສ່ກັບ
ລາຄາການກໍ່ສ້າງດ້ວຍລະບົບໄຟຟ້າຈາກເຂື່ອນ ໄຟຟ້ານ້ຳຕົກແລ້ວນຳມາສະເໜີຕໍ່ອົງການປົກຄອງແຂວງວຽງຈັນ
ອີກ ເທື່ອໜຶ່ງ; ຖ້າຫາກທຸກສິ່ງທຸກຢ່າງ ເປັນໄປດ້ວຍດີກໍອາດມີການເຊັນບົດບັນທຶກຄວາມເຂົ້າໃຈ (MOU) ເພື່ອສຶກ
ສາຄວາມເປັນໄປໄດ້ຂອງໂຄງການໃນຕໍ່ໜ້າ; ພ້ອມນີ້ທ່ານເຈົ້າແຂວງໆວຽງຈັນ ຍັງຊີ້ອີກວ່າສຳລັບໄຟຟ້າເຍືອງທາງ
ເທສະບານແຂວງວຽງຈັນ, ຄະນະນຳຂອງແຂວງໄດ້ເອກະພາບກັນໃຫ້ນຳໃຊ້ໄຟຟ້າແສງຕາເວັນທັງໝົດ.
ຕາມຂໍ້ມູນຈາກພະແນກພະລັງງານບໍ່ແຮ່ແຂວງວຽງຈັນ ໃຫ້ຮູ້ວ່າທົ່ວເທສະບານແຂວງມີຄວາມຕ້ອງການໄດ້ຕິດຕັ້ງ
ໄຟຟ້າແສງຕາເວັນປະມານ 1.500 ຊຸດ ທັງໝົດເປັນປະເພດດອກຄູ່.
ແຫລ່ງຂ່າວ: ເສດຖະກິດ – ສັງຄົມ