ສໍານັກຂ່າວ ເຄຊີອີເອັມ ສື່ຂອງທາງການເກົາຫຼີເໜືອ ໄດ້ມີການເຜີຍແຜ່ຮູບພາບຫຼາຍຮູບທີ່ກ່ຽວຂ້ອງກັບການທົດລອງຂີປະນາວຸດຂ້າມທະວີບແບບໃໝ່ ຫຼື new-type ICBM ວານນີ້ ໂດຍມີຮູບພາບຂີປະນາວຸດພ້ອມກັບຮູບພາບຂອງ ທ່ານ ຄິມ ຈອງ ອຶນ ທີ່ເດີນທາງມາກວດຄວາມຮຽບຮ້ອຍດ້ວຍຕົນເອງຫຼາຍຮູບ ລວມທັງຮູບຂີປະນາວຸດເທິງຖານປ່ອຍໃນລະຫວ່າງທີ່ກຽມພ້ອມຍິງ, ຮູບຂອງຜູ້ບັນຊາການທະຫານທີ່ກໍາລັງສັ່ງການ, ຮູບຂະນະທີ່ປ່ອຍຈະຫຼວດ ແລະ ລວມເຖິງຮູບພາບຂອງ ທ່ານ ຄິມ ຈອງ ອຶນ ທີ່ຢືນເບິ່ງການປ່ອຍຂີປະນາວຸດຄັ້ງນີ້ດ້ວຍຮອຍຍິ້ມ ເຊິ່ງຖືວ່າເປັນຊຸດຮູບພາບທີ່ມີລາຍລະອຽດຫຼາຍທີ່ສຸດໃນບັນດາຮູບທີ່ມີການເຜີຍແຜ່ກ່ຽວກັບການທົດລອງຂີປະນາວຸດນິວເຄລຍຂອງເກົາຫຼີເໜືອທີ່ຜ່ານມາ.
ໂດຍສໍານັກຂ່າວ ເຄຊີອີເອັມ ໄດ້ເອີ້ນຂີປະນາວຸດທີ່ເຮັດການທົດລອງຄັ້ງນີ້ວ່າ ຮວາຊອງໂພ-17 (Hwasongpo-17) ພ້ອມກ່າວວ່າ ການຍິງຂີປະນາວຸດດັ່ງກ່າວເກີດຂຶ້ນຢູ່ທີ່ສະໜາມບິນນານາຊາດປຽງຢາງທີ່ໃກ້ກັບເມືອງຊູນານ ຫ່າງຈາກເມືອງຫຼວງ ປະມານ 30 ກິໂລແມັດ. ການທົດລອງດັ່ງກ່າວ ເຊິ່ງເປັນອາວຸດທີ່ຖືກຫ້າມນີ້ ຖືວ່າເປັນການທົດລອງຄັ້ງທໍາອິດໃນຮອບເກືອບ 5 ປີ, ໂດຍຂີປະນາວຸດໄດ້ຖືກຕົກລົງໃນນ່ານນໍ້າທະເລຢິປຸ່ນໃນວັນທີ 24 ມີນາ ປີ 2022 ນີ້.
ຂີປະນາວຸດຂ້າມທະວີບລູກໃໝ່ຂອງເກົາຫຼີເໜືອສາມາດບິນໄດ້ໄກເຖິງ 1,100 ກິໂລແມັດ ຫຼັງຈາກທີ່ຖືກຍິງຂຶ້ນໃນລະດັບຄວາມສູງໄດ້ສູງສຸດເຖິງ 6,000 ກິໂລແມັດ ໃຊ້ເວລາບິນ 71 ນາທີ ໃນການມາເຖິງເປົ້າໝາຍທີ່ຢູ່ໄກປະມານ 1,100 ກິໂລແມັດ.
ອ້າງອີງ: KNCA