ທຸລະກິດຮ້ານອາຫານ ແລະ ທ່ອງທ່ຽວ ຖືໄດ້ວ່າເປັນທຸລະກິດທີ່ໄດ້ຮັບຜົນກະທົບໂດຍກົງຈາກ ໂຄວິດ-19 ເຮັດໃຫ້ຫຼາຍໆຄົນ ຫຼື ນັກທ່ອງທ່ຽວມີຄວາມກັງວົນຕໍ່ຄວາມປອດໄພ ແລະ ຄວາມສະອາດດ້ານສຸຂະນະໄມເປັນຫຼັກ ຈຶ່ງກໍ່ໃຫ້ເກີດໂຄງການ LaoSafe ທີ່ຈະເຂົ້າມາດູແລມາດຕະຖານທາງດ້ານສຸຂະນະໄມ ໃຫກັບບັນດາທຸລະກິດໃນຂະແໜງການທ່ອງທ່ຽວ ເພື່ອສ້າງຄວາມໝັ້ນໃຈດ້ານສາທາລະນະສຸກໃຫ້ກັບນັກທ່ອງທ່ຽວທີ່ຈະເຂົ້າມາໃຊ້ບໍລິການທຸລະກິດຕ່າງໆນັ້ນເອງ.
ມື້ນີ້ທາງທີມງານລາວໂພສມີໂອກາດໄດ້ສຳພາດ ທ່ານ ນາງ ດາລາພອນ ພົນເສນາ ເຈົ້າຂອງຮ້ານອາຫານຄົວລາວ ເຊິ່ງເພິ່ນຈະມາເວົ້າຜົນດີໃນການເຂົ້າຮ່ວມໂຄງການ LaoSafe ສູ່ກັນຟັງ
ຖາມ: ແນະນໍາຮ້ານອາຫານຄົວລາວໃຫ້ຜູ້ອ່ານຮູ້ຈັກແດ່?
ຮ້ານອາຫານຄົວລາວ ເປັນຮ້ານທີ່ຈະນໍາສະເໜີອາຫານລາວເປັນຫຼັກ ແລະ ຍັງມີຫ້ອງປະຊຸມເພື່ອໃຫ້ຈັດງານສໍາມະນາອີກດ້ວຍ ຄົວລາວ ໄດ້ເປີດໃຫ້ບໍລິການມາ 28 ປີແລ້ວ ນັບຕັ້ງແຕ່ປີ 1994, ສະຖານທີ່ຕັ້ງຢູ່ ບ້ານຊຽງຍືນ ເມືອງຈັນທະບູລີ ນະຄອນຫຼວງວຽງຈັນ
ຖາມ: ເອື້ອຍຮູ້ຈັກໂຄງການ LaoSafe ນີ້ໄດ້ແນວໃດ?
ໄດ້ຍິນໂຄງການນີ້ມາດົນແລ້ວຕັ້ງແຕ່ໃນໄລຍະກາງປີ 2019 ທີ່ເພີ່ນໄດ້ຕິດຕໍ່ ຮ້ານອາຫານໃນນະຄອນຫຼວງວຽງຈັນຫຼາຍຮ້ານ ໄປປະຊຸມກັບໂຄງການວ່າຈະສ້າງມາດຕະຖານ ຄວາມປອດໄພໃນລະດັບປະເທດ ໂດຍຮ່ວມມືກັບທາງກະຊວງ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຈຶ່ງສອບຖາມທາງຮ້ານວ່າສົນໃຈສົ່ງຄົນໄປຮຽນບໍ່? ເລີຍຕອບວ່າມີຄວາມສົນໃຈຫຼາຍ ແລະໄດ້ເຂົ້າຮ່ວມໂຄງການໃນທ້າຍປີ 2020.
ຖາມ: LaoSafe ມີຜົນດີຫຍັງຕໍ່ທຸລະກິດຂອງເອື້ອຍແນ່ ?
ມີຜົນດີຫຼາຍດ້ານ ເພາະເພິ່ນໄດ້ແນະນໍາພວກເຮົາຫຼາຍໆຢ່າງເຊັ່ນ: ດ້ານພາຍໃນ ທາງຮ້ານແລະ ພະນັກງານກໍໄດ້ຄວາມຮູ້ໃນການປ້ອງກັນຕົນເອງ, ຮັກສາຄວາມສະອາດໃຫ້ໄດ້ຕາມມາດຕະຖານສາກົນ ທັງຍັງມີການກຽມຄວາມພ້ອມໃນການໃຊ້ມາດຕະການປ້ອງກັນພະຍາດ ໂຄວິດ 19 ສໍາລັບພະນັກງານ ມີການກວດວັດອຸນຫະພູມ ໃນທຸກໆມື້ ຂ້າເຊື້ອ ແລະ ເວັ້ນໄລຍະຫ່າງ, ໃນກໍລະນີທີ່ຄົນນອກມາສົ່ງອາຫານ ຫຼື ນ້ຳກ້ອນຕ້ອງໄດ້ມີການຈົດຊື່ເບີໂທ ແລະ ຂໍວັດອຸນຫະພູມເຊັ່ນດຽວກັນ
ສຳລັບດ້ານພາຍນອກ ຮ້ານອາຫານຄົວລາວແມ່ນມີມາດຕະການປ້ອງກັນ ເພາະກ່ອນໜ້າທີ່ຈະມີໂຄວິດຈະມີທັງແຂກຄົນລາວ ແລະ ຕ່າງປະເທດ ເຊິ່ງກວມເອົາ 30% ຂອງຮ້ານແມ່ນ ແຂກຕ່າງປະເທດ ເຊິ່ງໃນປັດຈຸບັນ, ປະເທດກຳລັງຈະເປີດ ແລະ ມີນັກທ່ອງທ່ຽວທີ່ຈະເຂົ້າມາຫຼາຍ ເຂົາເຈົ້າກໍຕ້ອງການຄວາມແນ່ໃຈວ່າຮ້ານທີ່ຈະໄປມີຄວາມປອດໄພ ແລະ ມີວິທີປ້ອງກັນທີ່ໄດ້ມາດຕະຖານ. ໃນນັ້ນມີບໍລິສັດທົວ ທີ່ເປັນຄູ່ຮ່ວມສັນຍາທີ່ເຮັດວຽກມາຫຼາຍປີແລ້ວເພີ່ນກໍໄດ້ສອບຖາມວ່າຕອນນີ້ຢູ່ລາວມີມາດຕະການຮັບຮອງແລ້ວຫຼືຍັງ ຄືຢູ່ປະເທດອ້ອມຂ້າງຫຼາຍໆປະເທດກໍມີແລ້ວ ເຊິ່ງໃນຕອນນີ້ກໍໄດ້ຮັບການຢັ້ງຢືນຈາກ LaoSafe ແລ້ວເຊິ່ງຈະສ້າງຄວາມໝັ້ນໃຈໃຫ້ເຂົາເຈົ້າໃນເວລາສ້າງແຜນທ່ອງທ່ຽວມາວ່າຈະພານັກທ່ອງທ່ຽວໄປກິນຢູ່ໃສແນ່ ຈຶ່ງຈະມີຄວາມປອດໄພ
ຖາມ: ເອື້ອຍມີຄວາມຮູ້ສຶກແນວໃດທີ່ໄດ້ເຂົ້າຮ່ວມໂຄງການ LaoSafe
ຮູ້ສຶກດີໃຈຫຼາຍທີ່ເພີ່ນໃຫ້ໂອກາດໃຫ້ເຮົາໄດ້ໄປຮຽນຮູ້ນຳ ແລະ ທາງຮ້ານເຮົາເປັນ 1 ໃນ 5 ຮ້ານທຳອິດຂອງໂຄງການນີ້ກໍມີຄວາມພາກພູມໃຈຫຼາຍທີ່ເພີ່ນໄດ້ເຫັນຄວາມສຳຄັນຂອງເຮົາແລະໄດ້ເຂົ້າມາຊ່ວຍ. ເຊື່ອວ່າຍັງມີຫຼາຍພາກສ່ວນທຸລະກິດທີ່ຢາກເຂົ້າໄປຮຽນຮູ້ ແລະ ຢາກໄດ້ໃບຍັ້ງຍືນຂອງໂຄງການນີ້ ແຕ່ເນື່ອງຈາກຄວາມຈຳກັດທາງບຸກຄະລາກອນ ຕ້ອງໃຊ້ຄູຝຶກຫຼາຍທ່ານ ເຊິ່ງໃຊ້ເວລາໃນການສອນ 2 ມື້ ແລະ ມີການກວດສອບ ຖ້າບໍ່ຜ່ານກໍໄດ້ລົງມາສອນໃໝ່ ເຊິ່ງກໍໃຊ້ເວລາດົນພໍສົມຄວນ.
ຖາມ: ຂັ້ນຕອນໃນການຮັບໃບຍັ້ງຍືນມີຄືແນວໃດ
ຂັ້ນຕອນໃນການຮັບໃບຢັ້ງຍືນແມ່ນມີຫຼາຍຂັ້ນຕອນກວ່າໂຄງການອື່ນໆທີ່ໄດ້ລອງມາ ເພາະວ່າ ເພີ່ນໄດ້ມີການລົງສອນຕົວຈິງທຽບໃສ່ໂຄງການອື່ນແມ່ນຕ້ອງໄດ້ສົ່ງຕົວແທນໄປເຂົ້າຟັງ 2 ຄົນຕໍ່ຮ້ານຫຼັງຈາກນັ້ນກໍກັບມາເລົ່າສູ່ກັນຟັງ ເຊິ່ງກໍມີປະສິດທິພາບໄດ້ໃນລະດັບໜຶ່ງ ແຕ່ທີ່ LaoSafe ເພີ່ນລົງມາສອນທຸກໆຄົນຢູ່ຮ້ານນັບຕັ້ງແຕ່ຜູ້ຈັດການ, ພະນັກງານເສີບ, ຜູ້ອານາໄມ, ແມ່ບ້ານ, ແມ່ຄົວ ແລະ ຜູ້ຊ່ວຍຄົວຕ້ອງໄດ້ຮູ້ພ້ອມກັນໝົດ ຫຼັງຈາກນັ້ນເພີ່ມກໍມີການກວດສອບວ່າຜ່ານການທົດສອບໝົດທຸກຂໍ້ຫຼືຍັງ ແລະ ອາທິດຕໍ່ມາຈະມີການກວດສອບໃໝ່ອີກຄັ້ງ.
ຖາມ: ສຸດທ້າຍນີ້ເອື້ອຍຢາກຝາກຫຍັງເຖິງຜູ້ທີ່ຍັງບໍ່ໄດ້ເຂົ້າຮ່ວມ ຫຼື ຍັງລັງເລໃນການເຂົ້າຮ່ວມຢູ່
ຢາກໃຫ້ຢາດໂອກາດນີ້ໄວ້ເນື່ອງຈາກວ່າເພີ່ນມີຜູ້ຊ່ຽວຊານທັງພາຍໃນ ແລະ ຕ່າງປະເທດ ໃນການລົງມາສອນໃນພາກທຸລະກິດມີແຕ່ໄດ້ກັບໄດ້ ແລະ ຍົກລະດັບຄວາມຮູ້ຄວາມສາມາດຂອງພະນັກງານ ໂດຍບໍ່ມີຄ່າໃຊ້ຈ່າຍຫຍັງ ເພີ່ມຄວາມໝັ້ນໃຈໃຫ້ທຸລະກິດ ແລະ ລູກຄ້າທີ່ມາໃຊ້ບໍລິການ ເພາະທາງຮ້ານໄດ້ຮຽນຮູ້ພາກທິດສະດີ ແລະ ປະຕິບັດແທ້ຈິງ
ຖ້າທຸລະກິດໃດທີ່ຕ້ອງການເຂົ້າຮ່ວມໂຄງການ LaoSafe ສາມາດດາວໂຫຼດໃບສະໝັກໄດ້ທີ່ https://www.tourismlaos.org/join-laosafe/ ຫຼື ສາມາດເບິ່ງຂໍ້ມູນເພີ່ມຕື່ມໄດ້ທີ່ ເພຈ LaoSafe