Homeຂ່າວພາຍ​ໃນກຳນົດແລ້ວມື້ເປີດ-ປິດ ງານກິລາແຫ່ງຊາດຄັ້ງທີ XI

ກຳນົດແລ້ວມື້ເປີດ-ປິດ ງານກິລາແຫ່ງຊາດຄັ້ງທີ XI

Published on

ຄະນະນຳກະຊວງສຶກສາທິການ ແລະ ກິລາ ຮ່ວມກັບ ຄະນະນໍາແຂວງຊຽງຂວາງ ຈັດກອງປະຊຸມປຶກສາຫາລືການກະກຽມຄວາມພ້ອມໃຫ້ແກ່ການຈັດງານມະຫາກຳກິລາແຫ່ງຊາດ ຄັ້ງທີ XI ໂດຍທີ່ປະຊຸມຕົກລົງເຫັນດີຮັບຮອງເອົາຫຼາຍບັນຫາໃນນີ້ລວມທັງການກໍານົດພິທີເປີດ-ປິດງານມະຫາກຳກິລາແຫ່ງຊາດ ຄັ້ງທີ XI (ມື້ເປີດວັນທີ 13 ທັນວາ 2022 ແລະ ມື້ປິດ ວັນທີ 22 ທັນວາ 2022), ເຫັນດີໃຫ້ຈັດງານແຂ່ງຂັນກິລາຄົນພິການທົ່ວປະເທດ ຄັ້ງທີ III ແລະ ເຫັນດີໃຫ້ໂຈະການເຄື່ອນໄຫວກິດຈະກຳເຍົາວະຊົນທັນວາ ໃນງານມະຫາກໍາກິລາແຫ່ງຊາດ ຄັ້ງທີ XI ເພື່ອຮັກສາສຸຂະພາບລູກຫຼານຂອງເຍົາວະຊົນ ແລະ ຫຼີກລ່ຽງການຕິດເຊື້ອພະຍາດໂຄວິດ-19.

ກອງປະຊຸມຄັ້ງນີ້ ໄດ້ມີຂຶ້ນເມື່ອວັນທີ 7 ມີນາ 2022 ທີ່ຫ້ອງປະຊຸມພະ ແນກສຶກສາທິການ ແລະ ກິລາແຂວງຊຽງຂວາງ, ພາຍໃຕ້ການເປັນປະທານຂອງ ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ, ໃຫ້ກຽດເຂົ້າຮ່ວມຂອງ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ ພ້ອມດ້ວຍຄະນະກຳມະການຮັບຜິດຊອບຝ່າຍຕ່າງໆ ຈັດງານມະຫາກຳກິລາແຫ່ງຊາດ ຄັ້ງທີ XI ຈາກຂັ້ນສູນກາງ ແລະ ຂັ້ນແຂວງຢ່າງພ້ອມພຽງ.

ໃນກອງປະຊຸມຜູ້ແທນທີ່ເຂົ້າຮ່ວມໄດ້ພ້ອມກັນຄົ້ນຄວ້າປຶກສາຫາລື ແລະ ເອກະພາບກັນຕໍ່ກັບໜ້າວຽກທີ່ສໍາຄັນທີ່ຕ້ອງໄດ້ຈັດຕັ້ງປະຕິບັດໃນຕໍ່ໜ້າໃຫ້ເປັນຮູບປະທໍາ ເປັນຕົ້ນແມ່ນ ໄດ້ຮັບຮອງເອົາຮ່າງວາລະກະກຽມກອງປະຊຸມຄະນະລະດັບຊາດ ຄັ້ງທີ V; ເນື້ອໃນ ແລະ ເປົ້າໝາຍແຂກເຂົ້າຮ່ວມ ແນໃສ່ອາທິດທີ IV ຂອງເດືອນມີນາ 2022 ຫຼື ອາທິດທີ I ຂອງເດືອນເມສາ 2022;

ກໍານົດພິທີເປີດ-ປິດງານມະຫາກຳກິລາແຫ່ງຊາດ ຄັ້ງທີ XI (ມື້ເປີດວັນທີ 13 ທັນວາ 2022 ແລະ ມື້ປິດ ວັນທີ 22 ທັນວາ 2022); ຮູບແບບການຈັດການແຂ່ງຂັນກິລາແຕ່ລະປະເພດແບ່ງອອກເປັນ 5 ໝວດ ໂດຍເລີ່ມ ຕົ້ນການແຂ່ງຂັນແຕ່ຕົ້ນເດືອນພະຈິກ ຫາ ທ້າຍເດືອນທັນວາ 2022 ແລະ ຈັດການແຂ່ງຂັນບາງປະເພດກິລາ ໃນໄລຍະທີ່ເປີດ-ປິດ ໃນງານດັ່ງກ່າວ;

ເຫັນດີໃຫ້ຈັດງານແຂ່ງຂັນກິລາຄົນພິການທົ່ວປະເທດ ຄັ້ງທີ III ໂດຍມອບໝາຍໃຫ້ກົມກິລາມວນຊົນ, ພະລະ ແລະ ສິລະປະສຶກສາ ຮີບຮ້ອນປັບປຸງແຜນເຄື່ອນໄຫວໃຫ້ທັນຕາມກໍານົດເວລາ;

ເຫັນດີໃຫ້ໂຈະການເຄື່ອນໄຫວກິດຈະກຳເຍົາວະຊົນທັນວາ ໃນງານມະຫາກໍາກິລາແຫ່ງຊາດ ຄັ້ງທີ XI ເພື່ອຮັກສາສຸຂະພາບລູກຫຼານຂອງເຍົາວະຊົນ ແລະ ຫຼີກລ່ຽງການຕິດເຊື້ອພະຍາດໂຄວິດ-19;

ເຫັນດີປັບປຸງບາງກໍາມະການ ແລະ ອະນຸກໍາມະການຝ່າຍຕ່າງໆຄືນໃໝ່ ຕາມຄວາມເໝາະສົມ; ເຫັນດີປັບປຸງແຜນການເຄື່ອນໄຫວ ແລະ ແຜນດໍາເນີນງານຈັດງານມະຫາກໍາກິລາແຫ່ງຊາດ ຄັ້ງທີ XI ຄືນ ເພື່ອໃຫ້ແທດເໝາະກັບສະພາບຕົວຈິງ; ຄະນະກໍາມະການຝ່າຍຕ່າງໆຮີບຮ້ອນຈັດສັນງົບປະມານຮັບໃຊ້ຄືນໃໝ່ ເພື່ອໃຫ້ແທດເໝາະກັບໜ້າວຽກທີ່ຈໍາເປັນ ບົນພື້ນຖານການປະຢັດ-ມັດທະຍັດ.

ພ້ອມດຽວກັນນັ້ນ, ກໍາມະການຝ່າຍຕ່າງໆໃຫ້ສືບຕໍ່ປັບປຸງແຜນວຽກ, ແຜນງົບປະມານຂອງຕົນຮັບຜິດຊອບໃຫ້ສໍາເລັດພາຍໃນອາທິດທີ III ຂອງເດືອນມີນາ 2022 ນີ້,

ນອກນັ້ນຍັງມີໜ້າວຽກອື່ນໆທີ່ປິ່ນອ້ອມທີ່ຜູ້ແທນເຂົ້າຮ່ວມກອງປະຊຸມໄດ້ຍົກຂຶ້ນມາປຶກສາຫາລື ເພື່ອເປັນແນວທາງໃຫ້ແກ່ການຈັດງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ດຳເນີນໄປຢ່າງຄ່ອງຕົວ ແລະ ຮັບປະກັນຜົນສໍາເລັດ.

ໂດຍ: ຄານສີສະຫວັນ ແຂວງຊຽງຂວາງ

ບົດຄວາມຫຼ້າສຸດ

ທ່ານ ສົມບູນ ສີຫານາດ ປະທານສະພາບໍລິຫານງານ ສະຖາບັນແມ່ນໍ້າຂອງ ພ້ອມຄະນະ ເດີນທາງຢ້ຽມຢາມ ສປ ຈີນ

ໃນໂອກາດທີ່ ສປປ ລາວ ໄດ້ຮັບກຽດເປັນປະທານໝູນວຽນຂອງ ສະພາບໍລິຫານງານສະຖາບັນແມ່ນໍ້າຂອງ (Council of Mekong Institute) ປະຈໍາສົກປີ 2025-2027 ພາຍໃຕ້ຄໍາຂວັນ: “ເພີ່ມທະວີການເຊື່ອມຈອດ ແລະ...

ທຳລາຍລະເບີດ 3 ໜ່ວຍ! ໂຄງການເກັບກູ້ລະເບີດແຫ່ງຊາດ ແຂວງອັດຕະປື ທຳລາຍລະເບີດໃຫຍ່ ປະເພດ MK 82 GPLD ນໍ້າໜັກ 500 ປອນ ຈໍານວນ 3 ໜ່ວຍ

ໃນວັນທີ 17-19 ພຶດສະພາ 2026 ຜ່ານມາ, ທີມງານພາກສະໜາມຂອງໂຄງການເກັບກູ້ລະເບີດແຫ່ງຊາດ (ຄກລ) ປະຈໍາແຂວງອັດຕະປື ໂດຍໄດ້ຮັບການສະໜັບສະໜູນຈາກລັດຖະບານ ສະຫະ ລັດອາເມລິກາ ສຳເລັດການທຳລາຍລະເບີດໃຫຍ່ ປະເພດ MK...

ຮ່າງບົດສະຫຼຸບຕີລາຄາວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ.

  ກອງປະຊຸມໃນຄັ້ງນີ້ ຈະໄດ້ຮັບຟັງການລາຍງານ, ຄົ້ນຄວ້າ, ປຶກສາຫາລື ແລະ ໃ​ຫ້​ທິດຊີ້ນຳ ຕໍ່ບັນຫາເນື້ອໃນສໍາ​ຄັນ ດັ່ງນີ້: ຜົນການນໍາພາ-ຊີ້ນໍາ ຂອງກົມການເມືອງ ແລະ ຄະນະເລຂາທິການສູນກາງພັກ ປະຈໍາ 6 ເດືອນຕົ້ນປີ...

ປັດຈຸບັນ ໄດ້ຈັດຕັ້ງປະຕິບັດໜ້າວຽກໃນ 4 ຕົວເມືອງຂອງໂຄງການທາງດ່ວນວຽງຈັນ-ຮ່າໂນ້ຍ.

ທ່ານ ປອ ພອນປະເສີດ ອິນທະສອນ ປະທານ ບໍລິສັດ ສາມເອສ໌ ພັດທະນາ ຈໍາກັດ ຕ່າງໜ້າກຸ່ມບໍລິສັດ ພັດທະນາກໍ່ສ້າງທາງດ່ວນ ວຽງຈັນ-ຮ່າໂນ້ຍ ຊ່ວງ ຈາກເມືອງປາກຊັນ...