ອີງຕາມການລາຍງານຈາກສຳນັກຂ່າວ Vientiane time ລາຍງານວ່າ: ເມື່ອວັນທີ 4 ມີນາ 2022 ທີ່ຜ່ານມານີ້ ກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບສູນກາງສະຫະພັນກໍາມະບານລາວ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວໄດ້ຈັດກອງປະຊຸມ 3 ຝ່າຍ ຮ່ວມກັນ ເພື່ອປືກສາກ່ຽວກັບການປັບຂຶ້ນຄ່າແຮງຂັ້ນຕໍ່າ ໂດຍການເປັນປະທານຂອງ ທ່ານນາງ ໃບຄໍາ ຂັດທິຍະ ລັດຖະມົນຕີກະຊວງ ຮສສ, ທ່ານ ນາງ ອາລີ ວົງບຸນທໍາ ປະທານຄະນະບໍລິຫານ ສູນກາງສະຫະພັນກໍາມະບານລາວ ແລະ ທ່ານ ວັນທອງ ສິດທິກຸນ ຮອງປະທານສະພາການຄ້າ ແລະ ອຸດສະຫະກໍາແຫ່ງຊາດລາວ.
ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງ ຮສສ ໄດ້ກ່າວທີ່ກອງປະຊຸມວ່າ: ຜົນກະທົບທີ່ເກີດຍ້ອນການລະບາດຂອງພະຍາດໂຄວິດ-19 ເຮັດໃຫ້ທຸລະກິດ,ການຜະລິດ ຫ ແລະ ການບໍລິການຖືກບປິດລົງ ຫຼື ຖືກໂຈະໂດຍບໍ່ມີກໍານົດເວລາ ເຮັດໃຫ້ຜູ້ອອກແຮງງານລາວ ກໍຕ້ອງໄດ້ອອກຈາກວຽກ ຫຼື ໂຈະການເຮັດວຽກ ເປັນຈໍານວນຫຼວງຫຼາຍ ເຮັດໃຫ້ອັດຕາການວ່າງງານ ເລີ່ມຈາກ 9,7% ມາເປັນ 21,8% ໃນທ້າຍປີ 2021.
ທ່ານ ນາງ ໃບຄໍ ຍັງໄດ້ກ່າວຕື່ມວ່າ: ໄດ້ມອບໝາຍໃຫ້ສາມອົງການຈັດຕັ້ງປະຕິບັດຕາມພາລະບົດບາດ ແລະ ຫນ້າທີ່ຂອງຕົນ ແນໃສ່ການສ້າງຜົນປະໂຫຍດຮ່ວມກັນ ຕາມແນວທາງປ່ຽນໄປໃຫມ່ຮອບດ້ານ ແລະ ມີຫຼັກການຂອງລັກ ນັ້ນຄື ການສ້າງ ແລະ ພັດທະນາສີມືແຮງງານໃຫ້ສອດຄ່ອງກັບຄວາມຕ້ອງການ ຂອງຕະຫຼາດແຮງງານ, ສົ່ງເສີມການມີວຽກເຮັດງານທຳທີ່ມີຄຸນຄ່າ ຂະຫຍາຍການປົກຄຸມດ້ານການປະກັນສັງຄົມ ເອົາໃຈໃສ່ປົກປ້ອງສິດ ແລະ ຜົນປະໂຫຍດຂອງຜູ້ໃຊ້ແຮງງານ ເພື່ອກ້າວເຂົ້າສູ່ການບັນລຸຕາມຄາດໝາຍການພັດທະນາແບບຢືນຍົງ ໂດຍສະເພາະຄາດໝາຍທີ 8 ຂອງສາກົນ.
ກອງປະຊຸມຄັ້ງນີ້ມີການກໍານົດບັນດາຫນ້າວຽກຕົ້ນຕໍ ທັງຫມົດ 12 ຫນ້າວຽກ, ໃນນັ້ນ ການປັບປຸງຄ່າແຮງງານຂັ້ນຕໍ່າສຸດ ໃຫ້ຜູ້ອອກແຮງງານພາກວິສາຫະກິດ ເປັນບຸລິມະສິດຫນຶ່ງທີ່ໄດ້ມີການຄົ້ນຄວ້າຄ່າແຮງງານຕ່ຳສຸດ ເຊິ່ງຄະນະກໍາມະການສາມຝ່າຍຂັ້ນສູນກາງ ໄດ້ດໍາ ເນີນການຄົ້ນຄວ້າ ພິຈາລະນາ ການປັບປຸງຄ່າແຮງງານຂັ້ນຕໍ່າສຸດຢູ່ ສປປ ລາວ, ແຕ່ດ້ວຍເງື່ອນໄຂ ແລະ ຄວາມພ້ອມຕ່າງໆຍັງບໍ່ອໍານວຍ ສະພາການຄ້າ ແລະ ອຸດສາ ຫະກໍາແຫ່ງຊາດລາວ ຈຶ່ງສະເຫນີເປັນ ວັນທີ 1 ເດືອນພຶດສະພາ 2023, ນັ້ນກໍເປັນພຽງຂໍ້ສະຫຼຸບ ທີ່ຍັງຕ້ອງສະເຫນີໃຫ້ລັດຖະບານ ພິຈາລະນາຄືນອີກຄັ້ງຫນຶ່ງ ກ່ອນຈະມີການປະກາດຢ່າງເປັນທາງການ.
ຂໍ້ມູນ-ພາບ: ກະຊວງ ຮສສ