ທ້າວ ລາຍັນ ໂອລາມ ເດັກນ້ອຍອາຍຸ 5 ປີ ຕົກລົງໄປໃນຂຸ່ມລຶກ 32 ແມັດ ເຊິ່ງຢູ່ໃນບໍລິເວນບ້ານຂອງເຂົາໃນເມືອງນ້ອຍໆ ທາງຕອນເໜືອຂອງໂມຣັອກໂກເມື່ອວັນທີ 1 ກຸມພາທີ່ຜ່ານມາ ເຈົ້າໜ້າທີ່ກູ້ໄພລະດົມກຳລັງໃຫ້ຄວາມຊ່ວຍເຫຼືອຕັ້ງແຕ່ຄືນດັ່ງກ່າວ ຈົນສາມາດນຳໂຕເດັກນ້ອຍຂຶ້ນມາໄດ້ໃນວັນທີ່ 5 ກຸມພາ.
ການປະຕິບັດການຊ່ວຍຊີວິດໃນຄັ້ງນີ້ໄດ້ຮັບຄວາມສົນໃຈຈາກຜູ້ຄົນທົ່ວໂມຣັອກໂກທີ່ຕ່າງກໍພາກັນສົ່ງກຳລັງໃຈໃຫ້ເດັກນ້ອຍ ແລະ ເຈົ້າໜ້າທີ່ ເຊິ່ງມີຜູ້ຄົນຈຳນວນຫຼາຍເດີນທາງໄປທີ່ເກີດເຫດເພື່ອຕິດຕາມເຫດການ ແລະ ພາວະນາໃຫ້ເດັກນ້ອຍຮອດຊີວິດ.
ທ່າມກາງຄວາມດີໃຈຂອງຄອບຄົວ ແລະ ຜູ້ຄົນຈຳນວນຫຼວງຫຼາຍທີ່ຕິດຕາມການປະຕິບັດການຊ່ວຍເຫຼືອຂອງເຈົ້າໜ້າທີ່ ແຕ່ພວກເຂົາຕ້ອງພົບກັບຄວາມໂສກເສົ້າເມື່ອແພດປະກາດວ່າ: ເດັກນ້ອຍໄດ້ເສຍຊີວິດຫຼັງຈາກທີ່ຊ່ວຍອອກມາໄດ້.
ພໍ່ຂອງລາຍັນໄດ້ເລົ່າວ່າ: ກ່ອນເກີດເຫດການເຂົາກຳລັງສ້ອມແປງປາກຂຸ່ມເກັບນ້ຳເຊິ່ງມີຄວາມກວ້າງພຽງ 25 ຊັງຕີແມັດແຕ່ໃນຂະນະທີ່ພໍ່ບໍ່ທັນສັງເກດລະວັງລູກຊາຍກໍ່ຕົກລົງໄປໃນຂຸ່ມ. ເຊິ່ງການປະຕິບັດຂອງເຈົ້າໜ້າທີ່ໃນຄືນດັ່ງກ່າວໄດ້ພະຍາຍາມສົ່ງຖັງອົກຊີ ແລະ ປ່ອນອາຫານລົງໄປໃນຂຸ່ມ ຫຼັງຈາກນັ້ນກໍວາງແຜນຂຸດດິນ ແລະ ເຈາະອຸໂມງເພື່ອເຂົ້າໄປຊ່ວຍ ແຕ່ຕ້ອງເຮັດຢ່າງລະມັດລະວັງເພາະຍ້ານດິນທີ່ຢູ່ແຄມຈະຕົກລົງໃສ່ ແລະ ຈະເຮັດໃຫ້ສະຖານະການຊ່ວຍເຫຼືອຍາກຂຶ້ນຕື່ມ.
ອ້າງອີງຂໍ້ມູນ: Mirror