ໃນວັນທີ 2 ກຸມພາ 2022 ທີ່ຄະນະແພດສາດ ໂຮງໝໍມະຫາວິທະຍາໄລນະເຣສວນ ແຂວງ ພິສະນຸໂລກ, ບັນດາແພດຜູ້ຊ່ຽວຊານທາງດ້ານດວງຕາ ໄດ້ອອກມາຖະແຫຼງວ່າ: ພົບຜູ້ປ່ວຍທີ່ເປັນໂຕພະຍາດປອດໜູຂຶ້ນຕາ ເຮັດໃຫ້ຕາບອດຂ້າງໜຶ່ງ ເຊິ່ງເປັນຄົນໄຂ້ຄົນທໍາອິດຂອງ ແຂວງພິສະນຸໂລກ ໂດຍຜູ້ປ່ວຍຄົນດັ່ງກ່າວມີອາຍຸ 40 ປີ ໄດ້ເຂົ້າມາປິ່ນປົວຕາຢູ່ທີ່ໂຮງໝໍ ແລະ ໄດ້ພົບວ່າມີອາການອັກເສບຢູ່ທີ່ຕາ ແລະ ພົບໂຕພະຍາດຢູ່ໃນຕາ. ໃນການເອົາໂຕພະຍາດດັ່ງກ່າວອອກຕາໃຊ້ເວລາປະມານ 1 ຊົ່ວໂມງ ແລະ ໂຕພະຍາດມີຄວາມຍາວ 0.5 ເຊັນຕີແມັດ.

ສາເຫດໃນເບື້ອງຕົ້ນຜູ້ປ່ວຍຄົນດັ່ງກ່າວແມ່ນມັກກິນອາຫານສຸກໆດິບໆ ເປັນຕົ້ນແມ່ນກຸ້ງແຊ່ນໍ້າປາທີ່ກິນເປັນປະຈໍາ,  ເຖິງແມ່ນວ່າຈະມີການຜ່າຕັດເອົາໂຕພະຍາດອອກຕາແລ້ວກໍຕາມ ແຕ່ກໍສົ່ງຜົນເຮັດໃຫ້ຕາບອດຍ້ອນວ່າໂຕພະຍາດໄດ້ເຂົ້າໄປເຈາະຈໍປະສາດຕາເຮັດໃຫ້ເກີດການອັກເສບ ແລະ ເປັນໜອງ. ພາຍຫຼັງຜ່າຕັດແລ້ວກໍຍັງຈະມີການກວດຮ່າງກາຍໃນສ່ວນອື່ນໆອີກດ້ວຍ.

ແຫຼ່ງຂ່າວ: Workpointtoday