ອິງຕາມການລາຍງານຈາກສຳນັກຂ່າວ Straitstimes ໃນວັນທີ 30 ມັງກອນ 2022 ໄດ້ລາຍງານວ່າ: ຟິລິບປິນກຽມພ້ອມເປີດປະເທດໃນເດືອນ ກຸມພາ ປີ 2022 ເພື່ອຕ້ອນຮັບນັກທ່ອງທ່ຽວກວ່າ 150 ປະເທດທີ່ສັກວັກຊີນຄົບໂດສ ໂດຍບໍ່ຕ້ອງກັກໂຕກ່ອນເຂົ້າໃນປະເທດຟິລິບປິນ ຫຼັງຈາກທີ່ການແຜ່ລະບາດຂອງໂຄວິດ-19 ສາຍພັນ ໂອໄມຄຣອນ ເລີ່ມຈາງລົງ ໃນຂະນະທີ່ຕົວເລກຜູ້ປ່ວຍກໍຫຼຸດລົງເຊັ່ນດຽວກັນ.

ນາງ ມາເຣຍ ໂຣຊາລິໂອ ແວເກ ເລຂາທິການໃຫຍ່ກະຊວງສາທາລະນະສຸກຟິລິບປິນໄດ້ລະບຸວ່າ: ການແຜ່ລະບາດຂອງພະຍາດໂຄວິດ-19 ສ່ວນໃຫຍ່ເກີດໃນຊຸມຊົນບໍ່ໄດ້ເກີດຈາກນັກເດີນທາງ ແລະ ປະເທດຕົ້ນທາງຂອງນັກທ່ອງທ່ຽວນັ້ນອາດມີຈຳນວນຜູ້ຕິດເຊື້ອໜ້ອຍກວ່າໃນ ຟິລິບປິນ ຈຶ່ງເຮັດໃຫ້ບໍ່ຈຳເປັນຕ້ອງບັງຄັບໃຊ້ມາດຕະການຄວບຄຸມນັກເດີນທາງ ແລະ ສິ່ງສຳຄັນກໍຄືການປ້ອງກັນການແຜ່ລະບາດໃນຊຸມຊົນ.

ໃນຊ່ວງກາງເດືອນທີ່ຜ່ານມາຍອດຜູ້ຕິດເຊື້ອໃນຟິລິບປິນເພີ່ມຂຶ້ນຮອດ 40,000 ຄົນຕໍ່ມື້ ແຕ່ຕົວເລກຜູ້ຕິດເຊື້ອໃນແຕ່ລະມື້ກໍຫຼຸດລົງເຫຼືອ 18,000 ຄົນ ລາຍງານເມື່ອວັນທີ  28 ມັງກອນ 2022, ໂດຍພົບວ່າພິ້ນທີ່ໃນນະຄອນຫຼວງມະນິລາ ມີຕົວເລກຜູ້ປ່ວຍເລີ່ມຫຼຸດລົງຢ່າງຕໍ່ເນື່ອງ ແລະ ຜູ້ປ່ວຍສ່ວນໃຫຍ່ມີອາການບໍ່ຮ້າຍແຮງເຮັດໃຫ້ໂຮງໝໍສາມາດຮັບຮອງຜູ້ປ່ວຍໃນປະເທດໄດ້.