ສໍານັກຂ່າວ BBC ໄດ້ລາຍງານວ່າ ລັດເຊຍໄດ້ລະດົມກໍາລັງທະຫານປະມານ 100,000 ຄົນ ພ້ອມດ້ວຍອາວຸດຕ່າງໆເຊັ່ນ ປືນໃຫຍ່, ລົດຖັງ, ເຄື່ອງກະສຸນ ທັງຍັງມີກອງກໍາລັງທາງອາກາດ ເຂົ້າກຽມພ້ອມຢູ່ທີ່ຊາຍແດນທີ່ຕິດກັບຢູເຄຣນ ແຕ່ລະບຸວ່າບໍ່ໄດ້ມີການຈະບຸກໂຈມຕີແຕ່ຢ່າງໃດ.

ໂດຍທະຫານທີ່ຫາກໍມາຮອດບາງໜ່ວຍ ເດີນທາງເປັນໄລຍະທາງປະມານ 6,437 ກິໂລແມັດ ຈາກພູມພາກຕາເວັນອອກຂອງລັດເຊຍ, ຫຼາຍຝ່າຍປະເມີນວ່າ ລັດເຊຍສົ່ງທະຫານໄປປະຈໍາການໃນພື້ນທີ່ຊາຍແດນຢູເຄຣນປະມານ 100,000 ຄົນ. ນອກຈາກທະຫານຂອງກອງທັບລັດເຊຍແລ້ວ ຍັງເຊື່ອວ່າ ປັດຈຸບັນ, ມີກຸ່ມຕິດອາວຸດແບ່ງແຍກດິນແດນປະຊາຊົນລັດເຊຍອີກປະມານ 15,000 ຄົນ ໃນພູມພາກລູຮັນ ແລະ ດໍແນສ ຂອງຢູເຄຣນ.

ນັກວິເຄາະຊາວຕາເວັນຕົກບາງຄົນລະບຸວ່າ ຍັງບໍ່ຊັດເຈນວ່າລັດເຊຍໄດ້ລະດົມອາວຸດ ແລະ ກໍາລັງທີ່ຈໍາເປັນສໍາລັບການບຸກໂຈມຕີທາງພາກພື້ນແລ້ວ ຫຼື ບໍ່. ພວກເຂົາໃຫ້ຮູ້ວ່າ ຂະນະນີ້ຍັງບໍ່ປາກົດເຫັນໂຮງໝໍເຄື່ອນທີ່ ແລະ ຜູ້ປະຕິບັດງານຢູ່ໃນບາງພື້ນທີ່ ເຊິ່ງຫາກບຸກຄະລາກອນທາງດ້ານການແພດເດີນທາງມາຮອດ ກໍອາດເປັນການບົ່ງຊີ້ເຖິງຄວາມພ້ອມໃນການໂຈມຕີຢ່າງຊັດເຈນກໍເປັນໄດ້.