ໃນວັນທີ 23 ມັງກອນ 2022 ທີ່ຜ່ານມາ ຊາວເປຣູຫຼາຍຮ້ອຍໃນໃນເມືອງລິມາ ໄດ້ພ້ອມໃຈກັນອອກໄປຕັດຜົມທີ່ຮ້ານເສີມຄວາມງາມ ແລະ ຮ້ານຕັດຜົມ ເພື່ອນໍາເສັ້ນຜົມໄປບໍລິຈາກ ແລະ ໃຊ້ເປັນສິ່ງກໍາຈັດຄາບນໍ້າມັນຈໍານວນຫຼາຍທີ່ມີລອຍຢູ່ໜ້ານໍ້າທະເລບໍລິເວນແຄມຊາຍຫາດຂອງເມືອງທ່າກາຍາໂອ ໃຫ້ກັບເມືອງລິມາ ກໍ່ໃຫ້ເກີດຄວາມເສຍຫາຍຢ່າງໃຫຍ່ຫຼວງຕໍ່ກັບລະບົບນິເວດທາງທະເລ ຫຼັງຈາກທີ່ເກີດເຫດການໂຮງງານກັ່ນນໍ້າມັນໄດ້ເຮັດນໍ້າມັນດິບຮົ່ວໄຫຼລົງທະເລໃນຊ່ວງທີ່ເກີດມີຄື້ນທະເລພັດເຂົ້າແຄມຝັ່ງເປຣູ ຫຼັງຈາກທີ່ເກີດພູເຂົາໄຟລະເບີດໃນຕອງກາ ໃນວັນທີ 15 ມັງກອນທີ່ຜ່ານມາ.
ການຕັດຜົມເພື່ອນໍາໄປບໍລິຈາກນັ້ນໄດ້ເກີດຂຶ້ນໃນຫຼາຍເມືອງທົ່ວປະເທດ ແລະ ຖືເປັນການສະແດງນໍ້າໃຈທີ່ເປັນອັນໜຶ່ງອັນດຽວກັນຂອງຊາວເປຣູໃນການກໍາຈັດຄາບນໍ້າມັນທີ່ຢູ່ໃນທະເລ.
ກ່ອນໜ້ານີ້ຊາວເປຣູໄດ້ປະທ້ວງຮຽກຮ້ອງໃຫ້ບໍລິສັດທີ່ເຮັດນໍ້າມັນຮົ່ວລົງທະເລນັ້ນອອກມາຊົດໃຊ້ຄວາມເສຍຫາຍທີ່ເກີດຂຶ້ນ ເພາະມັນສົ່ງຜົນເຮັດໃຫ້ນົກທະເລ ແລະ ສັດນໍ້າຕາຍເປັນຈໍານວນຫຼວງຫຼາຍ ແລະ ໃນຂະນະນີ້ເອງທາງລັດຖະບານຂອງປະເທດເປຣູໄດ້ປະກາດພາວະສຸກເສີນດ້ານສິ່ງແວດລ້ອມເປັນເວລາ 90 ມື້ ໃນພື້ນທີ່ແຄມຝັ່ງທະເລຂອງເມືອງລິມາ ເຊິ່ງໄດ້ຮັບຜົນກະທົບຈາກເຫດການນໍ້າມັນຮົ່ວໄຫຼໃນຄັ້ງນີ້ ໂດຍໄດ້ມີການລະບຸວ່າເປັນໜຶ່ງໃນໄພພິບັດທາງລະບົບນິເວດທີ່ສໍາຄັນທີ່ສຸດຂອງປະເທດ.
ແຫຼ່ງຂ່າວ: Thairath