ວັນທີ 14 ມັງກອນ 2022 ສໍານັກຂ່າວ thaipbs ລາຍງານວ່າ ເມື່ອວັນທີ 13 ມັງກອນ ທີ່ຜ່ານມາ ອົງການຢູນິເຊຟ ເຊິ່ງເປັນໜ່ວຍງານທີ່ໃຫ້ຄວາມຊ່ວຍເຫຼືອແກ່ເດັກນ້ອຍທົ່ວໂລກ ເປີດເຜີຍວ່າ ເມື່ອເດືອນທັນວາ 2021 ພຽງເດືອນດຽວ ວັກຊີນປ້ອງກັນໂຄວິດ-19 ທີ່ໄດ້ຮັບການຈັດສັນໂດຍໂຄງການໂຄແວັກ ຫຼາຍກວ່າ 100 ລ້ານໂດສ ໄດ້ຖືກປະຕິເສດຈາກປະເທດທຸກຍາກ ເນື່ອງຈາກວັກຊີນໃກ້ໝົດອາຍຸແລ້ວ ເຖິງແມ່ນວ່າ ຜູ້ຊຽວຊານຂອງຢູນິເຊຟໄດ້ເຂົ້າມາຊ່ວຍເຫຼືອເລື່ອງຈັດການວັກຊີນກໍຕາມ.

ນອກຈາກນີ້, ຍັງມີອີກຫຼາຍປະເທດທີ່ຂໍໃຫ້ຢຸດການສົ່ງວັກຊີນໄປຈົນຮອດ ເດືອນມີນາ ນີ້ ເພື່ອກຽມພ້ອມລະບົບການຂົນສົ່ງວັກຊີນທີ່ຕ້ອງໃຊ້ຄວາມເຢັນ, ໃນຂະນະທີ່ມີບາງປະເທດກັບມາຂໍໃຫ້ສົ່ງວັກຊີນອີກຄັ້ງ ເພື່ອກຽມພ້ອມໃນການສັກວັກຊີນໃນໄຕມາດຕໍ່ໄປ.

ດ້ານຜູ້ອໍານວຍການຮອງອົງການອະນາໄມໂລກ ລະບຸເຖິງສິ່ງທີ່ເກີດຂຶ້ນວ່າ ເປັນສິ່ງທີ່ໜ້າລະອາຍໃຈທາງສິນລະທໍາ ເນື່ອງຈາກປະເທດທີ່ລໍ້າລວຍພາກັນກັກຕຸນວັກຊີນເອົາໄວ້ ແຕ່ເມື່ອວັກຊີນໃກ້ໝົດອາຍຸຄ່ອຍນໍາມາບໍລິຈາກໃຫ້ກັບປະເທດທີ່ທຸກຍາກ.

ເມື່ອເດືອນທັນວາ 2021 ທີ່ຜ່ານມາ ອົງການອະນາໄມໂລກ ລະບຸວ່າມີຈໍານວນ 92 ປະເທດຈາກທັງໝົດ 194 ປະເທດ ທີ່ຍັງບໍ່ສາມາດສັກວັກຊີນໃຫ້ປະຊາກອນໄດ້ ຕາມເປົ້າໝາຍທີ່ກໍານົດໄວ້.