ດັ່ງທີ່ບັນດາທ່ານ ຮູ້ນຳກັນ ມື້ວານນີ້ ໄດ້ພົບຄົນເຈັບຕິດເຊື້ອສາຍພັນໂອໄມຄອນກໍລະນີທຳອິດ ໃນ ສປປລາວ ເຊີ່ງເປັນຄົນເຈັບຕິດເຊື້ອທີ່ເດີນທາງມາຈາກຕ່າງປະເທດ ພາຍຫຼັງມາຮອດ ສປປລາວ ກໍ່ໄດ້ມີການເກັບຕົວຢ່າງ ແລະ ຈຳກັດບໍລິເວນຕາມສະຖານທີ່ທີ່ທາງຄະນະສະເພາະກິດໄດ້ກຳນົດໄວ້ ແລະ ສຳລັບຜູ້ໂດຍສານອື່ນທີ່ຮ່ວມເດີນທາງມານຳກັນກໍ່ໄດ້ເຂົ້າຈຳກັດບໍລິເວນຕາມລະບຽບການຢູ່ໃນບັນດາໂຮງແຮມທີ່ທາງຄະນະສະເພາະກິດກຳນົດໄວ້ ແລະ ກໍ່ໄດ້ແຈ້ງໃຫ້ບັນດາໂຮງແຮມເຂັ້ມງວດການຈຳກັດບໍລິເວນຂອງຜູ້ໂດຍສານທີ່ເດີນທາງມາຈາກຖ້ຽວບີນດັ່ງກ່າວ ແລະ ເຂັ້ມງວດໃຫ້ພະນັກງານບໍລິການໃນໂຮງແຮມໃຫ້ປ້ອງກັນຕົນເອງຢ່າງເຂັ້ມງວດໃນເວລາແຈກຢາຍອາຫານ ນ້ຳດື່ມຫຼືເຄື່ອງໃຊ້ຕ່າງໆ ແລະ ຈະໄດ້ກວດຫາເຊື້ອ ໃນມື້ທີ່ 12 ກ່ອນອອກຈາກການຈຳກັດບໍລິເວນ.
• ບັນດາທ່ານທີ່ນັບຖື , ພະຍາດໂຄວິດ ສາຍພັນໂອໄມຄອນ ແມ່ນໄດ້ຖືກພົບໃນຫຼາຍກ່ວາ 130 ປະເທດ ໃນນັ້ນປະເທດລາວກໍ່ໄດ້ພົບກໍລະນີທຳອິດ, ສາຍພັນໂອໄມຄຣອນເປັນສາຍພັນທີ່ອົງການອະນາໄມໂລກຈັດເປັນສາຍພັນທີ່ນ່າເປັນຫ່ວງ ເພາະເປັນສາເຫດໃກ້ແກ່ການເກີດລະບາດຮອບໃໝ່ໃນຫຼາຍປະເທດ, ເຖິງແມ່ນວ່າ ສປປ ລາວ ໄດ້ຄົ້ນພົບຜູ້ຕິດເຊື້ອນໍາເຂົ້າ ທີ່ເປັນສາພັນໂອໄມຄອນຜູ້ທຳອິດ ເຊິງໄດ້ເຂົ້າມາກັກບໍລິເວນຢູ່ທີ່ໂຮງແຮມທີ່ຄະນະສະເພາະກິດໄດ້ກໍານົດໄວ້ ແລ້ວກໍ່ຕາມ, ແຕ່ກໍ່ຍັງມີການເຝົ້າລະວັງ ຕິດຕາມຢ່າງໃກ້ຊິດບັນດາຜູ້ທີ່ສໍາຜັດໃກ້ຊິດເຊັ່ນ: ພະນັກງານປະຈຳສະໜາມບິນ, ພະນັກງານຂັບລົດສົ່ງຜູ້ໂດຍສານໄປໂຮງແຮມຈຳກັດບໍລິເວນ, ພະນັກງານຕ້ອນຮັບໂຮງແຮມ.
• ດັ່ງທີ່ບັນດາທ່ານຮູ້ດີແລ້ວວ່າ ສາຍພັນໂອໄມຄອນນີ້ມີການແຜ່ເຊື້ອໄປຫາຜູ້ອື່ນ ແຜ່ເຊື້ອຫາຫຼາຍຄົນໄດ້ໄວ ເປັນວົງກ້ວາງ ເຊິ່ງຜູ້ທີ່ຕິດເຊື້ອສາຍພັນນີ້ແມ່ນມີອາການ ເມື່ອຍປວດຕາມກ້າມຊີ້ນ, ເຈັບຄໍ, ໄອເເຫ້ງ, ເຈັບຫົວ, ມີໄຂ້ຕໍ່າໆ.
• ຈາກການສືກສາຄົ້ນຄ້ວາຂອງບັນດານັກວິທະຍາສາດ ຫຼາຍປະເທດ ກ່ຽວກັບ ສາຍພັນ ່ ໂອໄມຄຣອນ ພົບວ່າ ເຖິງວ່າເຊື້ອພະຍາດຈະມີການກະຈາຍໂຕໄວເຮັດໃຫ້ຕິດເຊື້ອງ່າຍຂື້ນ 3-3,5 ເທົ່າ ທຽບໃສ່ສາຍພັນທີ່ລະບາດກ່ອນໜ້ານີ້ ແຕ່ວ່າ ອາການຂອງບັນດາຄົນເຈັບທີ່ຕິດເຊື້ອແມ່ນຂ້ອນຂ້າງ ເບົາບາງ ຫາ ປານກາງ, ໃນທະວີບອາຟຣິກກາໃຕ້ພົບວ່າອັດຕາການເສຍຊີວິດຂອງຄົນເຈັບທີ່ຕິດເຊື້ອສາຍພັນໂອໄມຄຣອນປະມານ 6% ເຊີ່ງອັດຕາການເສຍຊີວິດຕ່ຳກ່ວາສາຍພັນທີ່ພົບໃນໄລຍະຜ່ານມາທີ່ມີອັດຕາການເສຍຊີວິດ 17% ແຕ່ກໍ່ພົບວ່າມີອັດຕາການເສຍຊີວິດໃນໄວໜຸ່ມ ຊ່ວງອາຍຸ 20-40 ປີສຳລັບສາຍພັນໂອໄມຄຣອນ, ນອກຈາກນີ້ ຜູ້ທີ່ເຂົ້ານອນປີ່ນປົວສາຍພັນໂອໂມຄຣອນຢູ່ໂຮງໝໍຍັງມີອາການດີໄວຂື້ນກ່ວາເກົ່າໃຊ້ເວລາສະເລ່ຍປີ່ນປົວປະມານ 2.8 ມື້ ທຽບໃສ່ສາຍພັນຜ່ານມາທີ່ນອນປີ່ນປົວສະເລ່ຍປະມານ 8,5ມື້ ແລະ ຄາດຄະເນວ່າອາດສ້າງຄວາມເສຍຫາຍ ໄດ້ນ້ອຍກ່ວາ ສາຍພັນ ເດວຕ້າ ຫຼືສາຍພັນຜ່ານມາ. ແຕ່ເຖີງຢ່າງໃດກໍ່ຕາມສາຍພັນນີ້ ອາດຈະມີການຮຸນແຮງຂື້ນຖ້າເກີດໃນຜູ້ທີ່ມີພະຍາດປະຈໍາຕົວ ຫຼື ໃນຜູ້ສູງອາຍຸ, ແລະ ສາຍພັນ ໂອມິຄອນ ນີ້ ອາດຈະເຮັດໃຫ້ມີການຕິດເຊື້ອໄດ້ຊໍ້າຄືນໄດ້ປະມານສາມເທົ່າຕົວ ຖ້າທຽບໃສ່ ສາຍພັນເດວຕ້າ, ເຖີງຢ່າງໃດກໍ່ຕາມການສືກສານີ້ນັກວິທະຍາສາດກໍ່ຈະຕ້ອງໄດ້ດຳເນີນການສືກສາຄົ້ນຄ້ວາລະອຽດຕື່ມອີກ ຄາດວ່າອີກ ບໍ່ດົນໃນຕໍ່ໜ້າພວກເຮົາກໍ່ໄດ້ມີຂໍ້ມູນທີ່ຊັດເຈນຂື້ນກ່ວາເກົ່າ.
• ອີກເທື່ອໜື່ງກໍ່ບໍ່ໃຫ້ປະຊາຊົນ ແລະ ບັນດາທ່ານທີ່ກຳລັງຕິດຕາມຮັບຊົມ ແລະ ຮັບຟັງບໍ່ໃຫ້ມີຄວາມແຕກຕື່ນ ແລະ ຢ້ານກົວຈົນເກີນເຫດ ເພາະ ມາດຕະການທີ່ທາງຄະນະສະເພາະກິດເຮົາວາງອອກມາກໍ່ຮັດກຸມຢ່າງພຽງພໍ ແລະ ມາດຕະການດັ່ງກ່າວແມ່ນ ກໍ່ຍັງແມ່ນມາດຕະການທີ່ເຄີຍປະຕິບັດຜ່ານມາໃນການປ້ອງກັນໂຄວິດທົ່ວໄປ ເຊັ່ນ: ການໃສ່ຜ້າປິດປາກ-ດັງ, ຮັກສາໄລຍະຫ່າງ, ໝັ່ນລ້າງມືໃສ່ສະບູ ຫຼື ເຈວທີ່ມີທາດເຫຼົ້າ. ນອກຈາກນີ້ ຈະໄດ້ເຂັ້ມງວດໃນການກັ່ນກອງຜູ້ທີ່ເດີນທາງມາຈາກຕ່າງປະເທດ, ໂດຍສະເພາະຈາກບັນດາປະເທດທີ່ມີລາຍງານການລະບາດຂອງ Omicron, ເລັ່ງການສັກຢາວັກຊີນໃຫ້ໄດ້ບັນລຸເກີນ 70% ລວມທັງເຂັມກະຕຸ້ນ ເພື່ອໃຫ້ປະຊາຊົນມີພູມປ້ອງກັນຕໍ່ການຕິດເຊື້ອ.