ໃນວັນທີ 4 ມັງກອນ 2022 ຜ່ານມາ, ສໍານັກຂ່າວເອເອັບພີ ໄດ້ລາຍງານວ່າ: ເມືອງ ຍູໂຈວ ແຂວງເຫີນໜານ, ປະເທດຈີນໄດ້ນຳໃຊ້ມາດຕະການລັອກດາວ ຕັ້ງແຕ່ວັນທີ 3 ມັງກອນ 2022 ເປັນຕົ້ນໄປ. ຫຼັງຈາກພົບຜູ້ປ່ວຍທີ່ຕິດເຊື້ອໂຄວິດ-19 ຈຳນວນ 3 ຄົນທີ່ບໍ່ມີອາການ ສົ່ງຜົນໃຫ້ປະຊາຊົນໃນເມືອງປະມານ 1.17 ລ້ານຄົນ ຕ້ອງກັກໂຕຢູ່ເຮືອນເພື່ອປ້ອງກັນການແຜ່ລະບາດຂອງພະຍາດໂຄວິດ-19.

ໃນຂະນະທີ່ ລັດທະບານຈີນຍັງຄົງໃຊ້ກົນລະຍຸດ Zero Covid  ຫຼື ຄວບຄຸມໂຄວິດໃຫ້ເປັນສູນໂດຍໃຊ້ມາດຕະການລັອກດາວ ແລະ ເຝົ້າລະວັງເຂດພົມແດນຢ່າງເຂັ້ມງວດຕັ້ງແຕ່ມີການລະບາດຂອງໄວຣັສ. ທາງການເມືອງຍູໂຈວ ສັ່ງຫ້າມປະຊາຊົນທຸກຄົນອອກນອກທີ່ພັກ ແລະ ຕ້ອງຊ່ວຍກັນເຝົ້າລະວັງບໍລິເວນເຂດນອກເມືອງ ເພື່ອດຳເນີນຄວບຄຸມການແຜ່ລະບາດ ລວມເຖິງການປິດໃຫ້ບໍລິການລົດໂດຍສານ, ຮ້ານຊັບພະສິນຄ້າ ແລະ ສະຖານທີ່ທ່ອງທ່ຽວ.

ນອກຈາກນີ້, ຈີນຍັງພົບຜູ້ປ່ວຍໂຄວິດ-19 ໃໝ່ອີກ 175 ລາຍເຊິ່ງເປັນໂຕເລກທີ່ຕໍ່າເມື່ອທຽບໃສ່ປະເທດອື່ນ ແຕ່ມີຜູ້ຕິດເຊື້ອລາຍໃໝ່ໃນຈີນສູງຂຶ້ນໃນຊ່ວງອາທິດທີ່ຜ່ານມາ ແລະ ເພີ່ມຂຶ້ນສູ່ຈຸດສູງສຸດນັບຕັ້ງແຕ່ເດືອນ ມີນາ ປີ 2020.