ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ໃນວັນທີ 4 ມັງກອນ 2022 ທີ່ຜ່ານມາ ໄດ້ເກີດເຫດດິນຖະຫຼົ່ມຢູ່ບໍລິເວນບ່ອນກໍ່ສ້າງແຫ່ງໜຶ່ງໃນເມືອງ ປີເຈ່ຍ ມົນທົນ ກຸ້ຍໂຈ ທາງຕາເວັນຕົກສ່ຽງໃຕ້ຂອງປະເທດຈີນ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 14 ຄົນ ແລະ ຍັງມີຜູ້ໄດ້ຮັບບາດເຈັບຈໍານວນ 3 ຄົນ ແລະ ມີຜູ້ສູນຫາຍອີກປະມານ 4 ຄົນ ເຊິ່ງຕອນນີ້ທາງທີມກູ້ໄພກໍາລັງເລັ່ງຄົ້ນຫາ.

ທາງດ້ານເທດສະບານຂອງເມືອງປີເຈ່ຍໄດ້ລະບຸວ່າ ເຫດການດິນຖະຫຼົ່ມໃນຄັ້ງນີ້ເກີດຂຶ້ນໃນເວລາປະມານ 19:00 ຂອງວັນຈັນ ທີ 3 ມັງກອນ 2022 ທີມເຈົ້າໜ້າທີ່ສຸກເສີນ, ໜ່ວຍດັບເພີງ ແລະ ໜ່ວຍຮັກສາຄວາມປອດໄພສາທາລະນະຫຼາຍກວ່າ 1,000 ຄົນໄດ້ເຂົ້າໄປຍັງພື້ນທີ່ດັ່ງກ່າວເພື່ອຄົ້ນຫາຜູ້ສູນຫາຍ ແລະ ຜູ້ເສຍຊີວິດ.

ໃນຂະນະດຽວກັນກະຊວງການຈັດການເຫດການສຸກເສີນຂອງຈີນໄດ້ຈັດສົ່ງບຸກຄະລາກອນລົງພື້ນທີ່ເກີດເຫດເພື່ອແນະອນວທາງການກູ້ໄພ ສ່ວນສາເຫດຂອງດິນຖະຫຼົ່ມຢູ່ລະຫວ່າງການສືບສວນຂອງທີມງານຜູ້ຊ່ຽວຊານໃນພື້ນທີ່.