ວັນທີ 28 ທັນວາ 2021 ສໍານັກຂ່າວ nbcnews ແລະ BBC ໄດ້ລາຍງານວ່າ ວັນທີ 27 ທັນວາ ທີ່ຜ່ານມາ ສູນຄວບຄຸມພະຍາດຕິດຕໍ່ຢູ່ອາເມລິກາ (CDC) ອອກມາຖະແຫຼງການແຈ້ງຂໍ້ແນະນໍາໃໝ່ ໂດຍຈະຫຼຸດຜ່ອນໄລຍະເວລາການກັກໂຕຂອງຜູ້ຕິດເຊື້ອໂຄວິດ-19 ທີ່ບໍ່ສະແດງອາການຈາກ 10 ມື້ເຫຼືອພຽງແຕ່ 5 ມື້, ຫຼັງຈາກນັ້ນ ຈະຕ້ອງສວມໃສ່ໜ້າກາກອະນາໄມຂະນະທີ່ຢູ່ບ່ອນມີຄົນຫຼາຍ.
ສາເຫດທີ່ CDC ປ່ຽນຂໍ້ແນະນໍາໃໝ່ກ່ຽວກັບໄລຍະເວລາການກັກກັກຜູ້ຕິດເຊື້ອ ໂຄວິດ-19 ລົງເຄິ່ງໜຶ່ງ ຫຼັງຈາກມີຫຼັກຖານບົ່ງບອກວ່າ ເຊື້ອໂຄວິດ-19 ຈະແຜ່ກະຈາຍໄປສູ່ຜູ້ອື່ນໄດ້ສູງສຸດໃນໄລຍະ 2-3 ມື້ທໍາອິດ ຫຼັງຈາກມີອາການ
ດັ່ງນັ້ນ, ຜູ້ທີ່ໄດ້ຮັບການກວດພົບເຊື້ອໂຄວິດ-19 ຄວນກັກໂຕຕົນເອງເປັນໄລຍະເວລາ 5 ມື້ ແລະ ຫາກໃນຊ່ວງທີ່ກັກໂຕນີ້ບໍ່ມີອາການໃດໆເກີດຂຶ້ນ ບຸກຄົນນັ້ນອາດຈະບໍ່ຕ້ອງກັກໂຕ ແຕ່ຕ້ອງປະຕິບັດຢ່າງເຂັ້ມງວດໃນການສວມໃສ່ໜ້າກາກອະນາໄມຕໍ່ອີກເປັນໄລຍະເວລາ 5 ມື້ ເປັນຢ່າງຕໍ່າ ເພື່ອເປັນການຫຼຸດຄວາມສ່ຽງທີ່ຈະແຜ່ກະຈາຍເຊື້ອໄປຍັງບຸກຄົນອື່ນໆ.
ນອກຈາກນັ້ນ CDC ຍັງອອກຂໍ້ແນະນໍາກ່ຽວກັບປະຊາຊົນທີ່ຍັງບໍ່ໄດ້ໄປສັກວັກຊີນ ຫຼື ສັກວັກຊີນ mRNA ຈໍານວນ 2 ເຂັມ ມາດົນກວ່າ 6 ເດືອນ ແລະ ຍັງບໍ່ໄດ້ຮັບການສັກວັກຊີນບູສເຕີເຂັມທີ 3 ຫາກຕິດໂຄວິດ-19 ແຕ່ບໍ່ສະແດງອາການ ກໍຄວນກັກໂຕເປັນເວລາ 5 ມື້ ຈາກນັ້ນ, ຄວນສວມໃສ່ໜ້າກາກອະນາໄມເປັນເວລາອີກ 5 ມື້ເຊັ່ນດຽວກັນ