ເວັບໄຊ້ຕ່າງປະເທດ ໄດ້ລາຍງານວ່າ: Cloudflare ບໍລິສັດດ້ານການຮັກສາຄວາມປອດໄພທາງດ້ານໄອທີຂອງສະຫະລັ ດອາເມລິກາພົບວ່າ ແອັບພິເຄຊັ່ນ Tiktok ຂອງປະເທດຈີນສາມາດເອົາຊະນະ Google ແລະ ກາຍເປັນເວັບທີ່ມີຜູ້ໃຊ້ງານຫຼາຍທີ່ສຸດໃນໂລກປະຈໍາປີ 2021 ໄດ້ເປັນຄັ້ງທໍາອິດ ຫຼັງຈາກທີ່ໄດ້ຮັບຄວາມນິຍົມໃນຊ່ວງການແຜ່ລະບາດຂອງພະຍາດໂຄວິດ-19.

Tiktok ໄດ້ຂຶ້ນມາເປັນອັນດັບໜຶ່ງໃນເດືອອນກຸມພາ, ມີນາ ແລະ ພຶດສະພາ ແລະ ກາຍມາເປັນຜູ້ນໍາດ້ານທາງດ້ານແອັບພິເຄຊັ່ນ ຫຼັງຈາກວັນທີ 10 ສິງຫາ ເຊິ່ງຖືໄດ້ວ່າເປັນການກ້າວກະໂດດຄັ້ງໃຫຍ່ ເພາະໃນປີທີ່ຜ່ານມາ Tiktok ຢູ່ໃນອັນດັບທີ 7 ຮອງຈາກ Facebook, Microsoft, Apple, Netflix, Amazon ແລະ Google.

ຈາກຂໍ້ມູນໄດ້ລະບຸວ່າ Tiktok ມີຜູ້ໃຊ້ງານຫຼາຍກວ່າ 1,000 ລ້ານຄົນໃນທົ່ວໂລກ ແລະ ເປັນທີ່ນິຍົມໃນກຸ່ມໄວໜຸ່ມ ແຕ່ເນື່ອງຈາກເກີດມີການລະບາດຂອງພະຍາດໂຄວິດ-19 ເຮັດໃຫ້ Tiktok ກາຍເປັນທີ່ນິຍົມໃນກຸ່ມຄົນທີ່ມີອາຍຸສູງເພີ່ມຂຶ້ນອີກ. ເວັບໄຊ້ Statista ໄດ້ລະບຸວ່າຜູ້ໃຊ້ງານເພີ່ມຂຶ້ນເຖິງ 180% ໃນສະຫະລັດອາເມລິກາທີ່ມີອາຍຸລະຫວ່າງ 15-25 ປີ.