ທ່ານ ທີໂດຣສ ອັດຮານອມ ຜູ້ອໍານວຍການອົງການອະນາໄມໂລກ ໄດ້ອອກມາເຕືອນປະຊາຊົນໃນທົ່ວໂລກໃຫ້ຕັດສິນໃຈຍົກເລີກ ຫຼື ເລື່ອນການຈັດງານສະເຫຼີມສະຫຼອງໃນຊ່ວງເທດສະການປີໃໝ່ ເຖິງແມ່ນວ່າຈະເປັນການຕັດສິນໃຈທີ່ຍາກລໍາບາກກໍຕາມ ແຕ່ເພື່ອປ້ອງກັນລະບົບສາທາລະນະສຸກຈາກການແຜ່ລະບາດຂອງພະຍາດໂຄວິດ-19 ທີ່ປັດຈຸບັນມີການລະບາດຂອງເຊື້ອກາຍພັນໂອໄມຄຣອນ.
ທາງດ້ານທ່ານ ທີໂດຣສ ໄດ້ກ່າວວ່າ ພວກເຮົາທຸກຄົນຕ່າງກໍເບື່ອໜ່າຍກັບພະຍາດນີ້, ທຸກຄົນຕ້ອງການໃຊ້ເວລາກັບຄອບຄົວ, ໝູ່ເພື່ອນ ແລະ ຕ້ອງການກັບໄປໃຊ້ຊີວິດແບບປົກກະຕິ ເພາະສະນັ້ນ, ພວກເຮົາເອງກໍຕັດສິນໃຈປົກປ້ອງຕົນເອງ ແລະ ຜູ້ອື່ນໂດຍການຍົກເລີກການຈັດງານເທດສະການຕ່າງໆ ຫຼັງຈາກສະຖານະການປົກກະຕິແລ້ວຈຶ່ງກັບມາຈັດງານສະເຫຼີມສະຫຼອງ ຈຶ່ງຈະບໍ່ຕ້ອງມາເສຍໃຈທີຫຼັງ.
ທາງດ້ານຫົວໜ້າທີມນັກວິທະຍາສາດຂອງອົງການອະນາໄມໂລກໄດ້ລະບຸວ່າຕອນນີ້ຍັງບໍ່ທັນສາມາດທີ່ຈະສະຫຼຸບໄດ້ຢ່າງລະອຽດວ່າເຊື້ອໂຄວິດ-19 ໂອໄມຄຣອນນັ້ນມີຄວາມຮຸນແຮງໜ້ອຍກວ່າສາຍພັນອື່ນ ດ້ວຍຈໍານວນຜູ້ຕິດເຊື້ອທີ່ເພີ່ມຂຶ້ນຢ່າງວ່ອງໄວ ເຮັດໃຫ້ເກີດຄວາມກັງວົນຕໍ່ລະບົບສາທາລະນະສຸກຂອງແຕ່ລະປະເທດ.
ໃນຂະນະນີ້ຫຼາຍປະເທດໃນທົ່ວໂລກ ເປັນຕົ້ນແມ່ນປະເທດຝຣັ່ງ ແລະ ເຢຍລະມັນ ກໍໄດ້ມີມາດຕະການຍົກລະດັບຄວາມເຂັ້ມງວດໃນການເດີນທາງເພື່ອກະກັດກັ້ນການແຜ່ລະບາດຂອງເຊື້ອໂອໄມຄຣອນ.
ແຫຼ່ງຂ່າວ: Thairath