ວັນທີ 21 ທັນວາ 2021, ສໍານັກຂ່າວ ndtv ແລະ channelnewsasia ລາຍງານວ່າ ເຈົ້າໜ້າທີ່ມາເລເຊຍໄດ້ເລັ່ງອົບພະຍົບຊ່ວຍເຫຼືອປະຊາຊົນ ຢູ່ຫຼາຍລັດທີ່ປະສົບໄພນ້ຳຖ້ວມຄັ້ງໃຫຍ່. ຫຼັງມີຝົນຕົກໜັກໃນທ້າຍອາທິດທີ່ຜ່ານມາ. ເຊິ່ງການທີ່ເກີດໄພນ້ຳຖ້ວມຄັ້ງໃຫຍ່ຢູ່ມາເລເຊຍຄັ້ງນີ້ ພົບຜູ້ເສຍຊີວິດເພີ່ມຂຶ້ນຢ່າງຕໍ່າ 14 ຄົນ ແລະ ມີປະຊາຊົນ ອີກ 70,000 ຄົນ ຖືກຍ້າຍອອກຈາກບ້ານເຮືອນທີ່ຖືກນ້ຳ.
ລັດ Selangor ເຊິ່ງເປັນລັດທີ່ເສດຖະກິດດີທີ່ສຸດຂອງມາເລເຊຍ ແລະ ມີປະຊາກອນໜາແໜ້ນທີ່ສຸດ. ເປັນໜຶ່ງໃນລັດທີ່ໄດ້ຮັບຜົນກະທົບໜັກທີ່ສຸດ, ປະຊາຊົນ 26,000 ຄົນຕ້ອງອົບພະຍົບໜີຈາກໄພນ້ຳຖ້ວມ ແລະ ມີປະຊາຊົນປະມານ 41,000 ຄົນ ຕ້ອງໄປອາໄສຢູ່ສູນພັກເຊົ່າຂອງທາງການ, ໃນຂະນະທີ່ຍັງມີການລະບາດຂອງ COVID-19 ຕໍ່ເນື່ອງ.
ທາງດ້ານສະມາຊິກສະພາຝ່າຍຄ້ານ ໄດ້ອອກມາຕໍາໜິ ການເຮັດວຽກຂອງເຈົ້າຫນ້າທີ່ ແລະ ລັດຖະບານວ່າ ເຈົ້າໜ້າທີ່ບໍ່ໄດ້ມີແຈ້ງເຕືອນໃຫ້ປະຊາຊົນຮັບຮູ້ລ່ວງໜ້າ ວ່າຈະເກີດໄພນ້ຳຖ້ວມຮ້າຍແຮງແຕ່ຢ່າງໃດ. ຂະນະທີ່ປະຊາຊົນມາເລເຊຍທີ່ເປີດຮ້ານຂາຍເຄື່ອງສຳອາງຢູ່ທີ່ນະຄອນຫຼວງກົວລາລຳເປີ ບອກວ່າ ນັບຕັ້ງແຕ່ເຮັດທຸລະກິດມາດົນກວ່າ 24 ປີ ກໍບໍ່ເຄີຍເຫັນເຫດການນໍ້າຖ້ວມທີ່ຮ້າຍແຮງແບບນີ້ມາກ່ອນ. ທາງດ້ານລັດຖະບານມາເລເຊຍກ່າວວ່າ: ໄພນ້ຳຖ້ວມຢູ່ມາເລເຊຍເປັນໜຶ່ງໃນໄພນໍ້າຖ້ວມທີ່ຮ້າຍແຮງທີ່ສຸດຢູ່ທີ່ມາເລເຊຍໃນຮອບ 100 ປີ.