ພົນເອກ ປະຍຸດ ຈັນໂອຊາ, ນາຍົກລັດຖະມົນຕີແຫ່ງປະເທດໄທ ໄດ້ສັ່ງປິດລະບົບ Test & Go ແລະ Sandbox ໃນການເປີດຮັບນັກທ່ອງທ່ຽວຕ່າງປະເທດຊົ່ວຄາວນັບແຕ່ວັນທີ 21 ພະຈິກ 2021 ເປັນຕົ້ນໄປ ຍົກເວັ້ນພູເກັດແຊັນບ໊ອກ ກ່ອນຈະປະເມີນອີກຄັ້ງໃນວັນທີ 4 ມັງກອນ 2022 ທັງນີ້ກໍເພື່ອເປັນການສະກັດກັ້ນ ແລະປ້ອງກັນພະຍາດໂຄວິດ ສາຍພັນໂອໄມຄຣອນ.
ທ່ານ ພົນເອກ ປະຍຸດ ຈັນໂອຊາ ກ່າວວ່າ: ນັບແຕ່ວັນທີ 21 ພະຈິກເປັນຕົ້ນໄປ, ທາງການໄທຈະປິດລະບົບຮັບນັກທ່ອງທ່ຽວຕ່າງປະເທດທີ່ຈະເດີນທາງເຂົ້າໄປປະເທດໄທ ຂະນະທີ່ຂໍ້ມູນຫຼ້າສຸດລາຍງານວ່າ ມີນັກທ່ອງທ່ຽວຄ້າງໃນລະບົບເຖິງ 2 ແສນຄົນ ແລະທາງການຈະເລັ່ງດຳເນີນການແກ້ໄຂທັງໝົດ ພ້ອມທັງຕິດຕາມຢ່າງເຂັ້ມງວດ ຈົນຮອດວັນທີ 4 ມັງກອນ ປີໜ້າ ຈິ່ງຈະມີການປະເມີນອີກຄັ້ງ.
ທ່ານ ທະນາກອນ ວັງບຸນຄົງຊະນະ, ໂຄສົກປະຈຳສຳນັກງານນາຍົກລັດຖະມົນຕີໄທ ກໍໄດ້ຊີ້ແຈງເພີ່ມເຕີມວ່າ: ປັດຈຸບັນມີນັກທ່ອງທ່ຽວລົງທະບຽນຂໍເດີນທາງເຂົ້າປະເທດໄທ 2 ແສນຄົນ ເຊິ່ງລະບົບໄດ້ອະນຸມັດແລ້ວ 110.000 ຄົນ ສ່ວນທີ່ເຫຼືອອີກ 90 ພັນຄົນ ແມ່ນຍັງສາມາດເດີນທາງເຂົ້າໄທໄດ້ ແຕ່ຕ້ອງກວດ RT-PCR ເພີ່ມເປັນ 2 ຄັ້ງຈາກເມື່ອ່ກ່ອນພຽງ 1 ຄັ້ງ ເຊິ່ງລັດຖະບານໄທຈະເປັນຜູ້ຮັບຜິດຊອບຄ່າໃຊ້ຈ່າຍແທນ.
ຂໍ້ມູນຈາກ: ໄທຣັດ ອອນລາຍ