ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ກອງທັບໄທປະທ້ວງລັດຖະບານມຽນມາເປັນຄັ້ງທີ 2 ໃນຮອບໜຶ່ງອາທິດ ລວມທັງເຕືອນກອງທັບ ແລະ ກອງກໍາລັງສະຫະພາບແຫ່ງຊາດກະຫຼ່ຽງ (KNU) ທີ່ປະທະກັນໃນຝັ່ງຂອງປະເທດມຽນມາ ຫຼັງຈາກມີລູກປືນບໍ່ຮູ້ຊະນິດ ແລະ ບໍ່ຮູ້ຝ່າຍວ່າຍິງມາຈາກໃສຈໍານວນ 7 ລູກ ຖືກຍິງມາຕົກຢູ່ບໍລິເວນໃກ້ກັບແມ່ນໍ້າເມີຍໃນພື້ນທີ່ແຂວງ ຕາກ ໃນວັນທີ 19 ທັນວາ 2021.
ເລຂາທິການສະພາຄວາມໝັ້ນຄົງແຫ່ງຊາດ ກ່າວເຖິງຜົນກະທົບຈາກການສູ້ຮົບໃນມຽນມາຕໍ່ປະເທດໄທວ່າ ສະຖານະການຍັງຄົງມີຄວາມຮຸນແຮງຕໍ່ເນື່ອງນັບຈາກທີ່ມີການປະທະໃນມື້ທໍາອິດໃນັວນທີ 15 ທັນວາ 2021 ແລະ ມີຜູ້ລີ້ໄພຈາກການຕໍ່ສູ້ເຂົ້າມາເຂດຝັ່ງໄທປະມານ 2,000 ຄົນແລ້ວ ໂດຍທັງໝົດຜ່ານການກວດໂຄວິດ-19 ເຊິ່ງບາງຄົນກໍພົບວ່າມີການຕິດເຊື້ອໂຄວິດ-19 ແບລະ ກໍໄດ້ເຂົ້າຮັບການປິ່ນປົວແລ້ວ.
ດ້ານສູນສັ່ງການຊາຍແດນໄທ-ມຽນມາ ແຂວງ ຕາກ ໄດ້ລະບຸໃນເອກະສານຂ່າວສະຫຼຸບສະຖານະການທີ່ຊາຍແດນໄທ-ມຽນມາວ່າ ເກີດມີການປະທະກັນລະຫວ່າງທະຫານມຽນມາກັບກອງກໍາລັງຄົນກຸ່ມນ້ອຍເຊື້ອສາຍກະຫຼ່ຽງ ຢູ່ບໍລິເວນບ້ານແມ່ທອດທາງທິດໃຕ້ຂອງແຂວງ ມຽວດີ ເຊິ່ງຫ່າງຈາກຊາຍແດນເລິກເຂົ້າໄປໃນມຽນມາປະມານ 500 ແມັດ.
ເຖິງຢ່າງໃດກໍຕາມ ມີຜູ້ລີ້ໄພຈາກການຕໍ່ສູ້ທີ່ຂ້າມມາຝັ່ງໄທໄດ້ທະຍອຍກັບມຽນມາແລ້ວປະມານ 330 ຄົນ ຫຼັງຈາກທີ່ການຕໍ່ສູ້ໃນບາງພື້ນທີ່ຍຸຕິລົງ.