ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ທ້າວ ໄມ ຮິວ ຊາວອາເມລິກາ ອາຍຸ 64 ປີ ຜູ້ທີ່ມັກຮັກການຜະຈົນໄພ ແລະ ມີຄວາມເຊື່ອວ່າໂລກນີ້ແບນບໍ່ໄດ້ເປັນວົງມົນ ໄດ້ເສຍຊີວິດຈາກອຸບັດຕິເຫດຈະຫຼວດຕົກລົງກາງທະເລຊາຍໃນອາເມລິກາ ເຊິ່ງເປັນຈະຫຼວດທີ່ລາວສ້າງຂຶ້ນເອງເພື່ອອອກສໍາຫຼວດໂລກ.
ເຫດການດັ່ງກ່າວເກີດຂຶ້ນໃນຊ່ວງຕອນເຊົ້າຂອງວັນເສົາທີ 22 ກຸມພາ ໂດຍເປົ້າໝາຍໃນການປ່ອຍຈະຫຼວດໃນຄັ້ງນີ້ກໍເພື່ອ ທ້າວ ໄມ ຮິວ ຈະໄດ້ເອົາຕົວເອງຂຶ້ນສູ່ຄວາມສູງທີ່ຫ່າງຈາກພື້ນດິນ 1,525 ແມັດ ເພື່ອເບິ່ງໃຫ້ເຫັນກັບຕາຕົນເອງວ່າຂອບຟ້ານັ້ນເປັນເສັ້ນໂຄງຫຼືບໍ່ ເພື່ອຈະພິສູດດ້ວຍຕົນເອງວ່າໂລກນີ້ບໍ່ໄດ້ເປັນວົງມົນ.
ສະຖານີໂທລະພາບ Science Channel ຂອງສະຫະລັດອາເມລິກາ ໄດ້ບັນທຶກພາບເຫດການດັ່ງກ່າວທີ່ເກີດຂຶ້ນຢ່າງບໍ່ຄາດຄິດ ໂດຍຈະຫຼວດຕົກລົງມາຫຼັງຈາກຂຶ້ນຈາກພື້ນດິນໄປໄດ້ໜ້ອຍດຽວ ແລະ ເຮັດໃຫ້ເຂົາເສຍຊີວິດ.
ບັນດານັກວິທະຍາສາດຫຼາຍຄົນ ແລະ ຜູ້ທີ່ສົນໃຈໄດ້ໃຫ້ຄວາມຄິດເຫັນວ່າ ມີວິທີພິສູດຮູບຊົງຂອງໂລກວ່າເປັນວົງມົນຫຼື ແບນໂດຍການນັ່ງເຄື່ອງບິນຂ້າມທະວີບ ເຊິ່ງຈະເຮັດໃຫ້ເຫັນເສັ້ນຂອບຟ້າທີ່ເປັນເສັ້ນໂຄ້ງຢ່າງຊັດເຈນ ແຕ່ບາງຄົນກໍອອກມາສະແດງຄວາມຊົມເຊີຍທີ່ລາວມີຄວາມພະຍາຍາມ ແລະ ກ້າຄິດກ້າເຮັດ ແລະ ຍັງພິສູດຄວາມເຊື່ອຄວາມຂອງຕົນເອງ ໂດຍໃຊ້ວິທີທີ່ເປັນວິທະຍາສາດ.