ໃນວັນທີ 13 ທັນວາ 2021 ເວັບໄຊ້ຂ່າວຕ່າງປະເທດໄດ້ລາຍງານວ່າ: ພູເຂົາໄຟ ກຸມເບ ບິເອຂາ ທີ່ຢູ່ເກາະ ລາປັນມາ ປະເທດສະເປນ ເຊິ່ງມີການປະທຸຕັ້ງແຕ່ເດືອນກັນຍາທີ່ຜ່ານມາ.

ເຖິງແມ່ນວ່າຈະຜ່ານມາ 85 ມື້ແລ້ວ ແຕ່ລາວາຂອງພູເຂົາໄຟກໍຍັງມີການໄຫຼອອກມາຕະຫຼອດ ແລະ ຍັງບໍ່ມີທ່າທີຈະເຊົາໄຫຼ ແລະ ຖືໄດ້ວ່າເປັນການລະເບີດຂອງພູເຂົາໄຟທີ່ດົນນານທີ່ສຸດໃນປະຫວັດສາດຂອງເກາະລາປັນມາອີກດ້ວຍ.

ທ່ານ ມາຣິອາໂນ ເອີນັນເດດ ເຈົ້າໜ້າທີ່ລັດຖະບານລະດັບສູງຂອງເກາະລາປັນມາ ໄດ້ກ່າວວ່າກ່ອນໜ້ານີ້ຜູ້ຊ່ຽວຊານດ້ານພູເຂົາໄຟຂອງສະເປນໄດ້ວິເຄາະວ່າການປະທຸຂອງພູເຂົາໄຟກິນເວລາປະມານ 3 ເດືອນ ແຕ່ກໍຍັງບໍ່ໄດ້ຊີ້ແຈງໄດ້ຢ່າງຊັດເຈນວ່າຈະເຊົາປະທຸຕອນໃດ ແລະ ນອກຈາກນັ້ນຍັງພົບແຜ່ນດິນໄຫວເຖິງ 24 ຄັ້ງ ແຕ່ກໍບໍ່ຮຸນແຮງ.

ສໍາລັບຄວາມເສຍຫາຍຈາກການລະເບີດຂອງພູເຂົາໄຟໃນຊ່ວງເກືອບ 3 ເດືອນທີ່ຜ່ານມາ ມີອາຄານບ້ານເຮືອນຫຼາຍກວ່າ 3,000 ຫຼັງໄດ້ຮັບຄວາມເສຍຫາຍ ປະຊາຊົນປະມານ 7,000 ກວ່າຄົນຕ້ອງໄດ້ອົບພະຍົບອອກຈາກພື້ນທີ່ດັ່ງກ່າວ.