ເກີດຫຍັງຂຶ້ນລະຫວ່າງປະເທດລັດເຊຍ ແລະ ປະເທດຢູເຄນ?
ຢູເຄນມີເຂດແດນທີ່ຕິດກັບເອີຣົບ ແລະ ລັດເຊຍ ແຕ່ປະເທດທີ່ເຄີຍເປັນສ່ວນໜຶ່ງຂອງສະຫະພາບໂຊຫວຽດນີ້ ມີຄວາມກ່ຽວຂ້ອງກັບລັດເຊຍທາງດ້ານສັງຄົມ ແລະ ວັດທະນາທໍາ ອີກທັງພາສາລັດເຊຍກໍຍັງເປັນພາສາທີ່ໃຊ້ກັນຢ່າງແຜ່ຫຼາຍໃນກຸ່ມຄົນຊາວຢູເຄນ
ທີ່ຜ່ານມາລັດເຊຍໄດ້ສະແດງຈຸດຢືນຕໍ່ຕ້ານຢູເຄນທີ່ຈະໄປເຂົ້າຮ່ວມກັບສະຖາບັນຕ່າງໆຂອງອີຢູ (EU) ແລະ ມີຂໍ້ຮຽກຮ້ອງສໍາຄັນວ່າ ຢູເຄນຕ້ອງບໍ່ເຂົ້າຮ່ວມເປັນສະມາຊິກຂອງອົງການສົນທິສັນຍາແອດແລນຕິກເໜືອ (ນາໂຕ) ຫຼື ປະຈໍາການອາວຸດຮ້າຍແຮງຂອງຊາດພັນທະມິດທາງການທະຫານໃນປະເທດ
ມີໂອກາດຫຼາຍປານໃດທີ່ລັດເຊຍຈະບຸກເຂົ້າປະເທດຢູເຄນ?
ຄວາມຂັດແຍ່ງລະຫວ່າງລັດຖະບານຢູເຄນ ແລະ ກຸ່ມແບ່ງແຍກດິນແດນທີ່ປະເທດລັດເຊຍໜຸນຫຼັງຍັງຄົງດໍາເນີນມາຈົນເຖິງປັດຈຸບັນ ແລະ ສິ່ງທີ່ເປັນກັງວົນອີກຢ່າງໜຶ່ງກໍຄືລັດເຊຍໄດ້ເພີ່ມກໍາລັງພົນໄປບໍລິເວນຊາຍແດນລັດເຊຍ-ຢູເຄນ
ໂຄສົກລັດຖະບານຂອງປະເທດລັດເຊຍໄດ້ຮຽກຮ້ອງໃຫ້ທຸກຝ່າຍຢ່າແຕກຕື່ນ ເຖິງຢ່າງໃດກໍຕາມໜ່ວຍງານຮຽບຮຽງຂ່າວຂອງຊາດຕາເວັນຕົກລວມເຖິງຢູເຄນຕ່າງກໍຄິດວ່າການໂຈມຕີ ຫຼື ການບຸກລຸກອາດຈະເກີດຂຶ້ນໃນຊ່ວງຕົ້ນປີ 2022
ເຖິງຢ່າງໃດກໍຕາມນີ້ອາດເປັນພຽງການສະແດງທີ່ເຮັດໃຫ້ຢູເຄນເກີດຄວາມຢ້ານກົວ ເພື່ອທີ່ລັດເຊຍຈະໄດ້ຮັບຄໍາຮັບປະກັນທີ່ຕົນເອງຕ້ອງການຈາກອົງການນາໂຕ ແລະ ໃນວັນທີ 7 ທັນວາ 2021 ທີ່ຜ່ານມາ ປະທານາທິບໍດີສະຫະລັດອາເມລິກາ ທ່ານໂຈໄບເດນ ແລະ ປະທານາທິບໍດີຂອງລັດເຊຍ ທ່ານປູຕິນ ໄດ້ໂອລົມກັນຜ່ານທາງໄກ ເພື່ອຫຼຸດຄວາມກົດດັນທີ່ເກີດຂຶ້ນ ແຕ່ກໍຍັງບໍ່ມີທ່າທີຈະຫຼຸດລົງ
ຖ້າຫາກເກີດສົງຄາມລະຫວ່າງສອງປະເທດແລ້ວຈະເປັນແນວໃດ?
ເຈົ້າໜ້າທີ່ລະດັບສູງໃນໜ່ວຍງານກວດກາຂ່າວຂອງຊາດຕາເວັນຕົກໄດ້ໃຫ້ສໍາພາດກັບນັກຂ່າວວ່າ ຫາກລັດເຊຍຕັດສິນໃຈທີ່ຈະບຸກປະເທດຢູເຄນການສູ້ຮົບອາດຈະແຜ່ຂະຫຍາຍເຂົ້າໄປເຖິງເອີຣົບໄດ້ ແລະ ຖ້າຫາກລັດເຊຍເລີ່ມເຮັດຫຍັງກໍຕາມກໍຈະນໍາໄປສູ່ການໂຕ້ຕອບຈາກຊາດສະມາຊິກນາໂຕ ແລະ ຖ້າຫາກລັດເຊຍຈະເຮັດສົງຄາມກັບຢູເຄນກໍຈະເຮັດໃຫ້ປະຊາຊົນຈໍານວນຫຼາຍຕ້ອງເສຍຊີວິດ ຫຼື ອົບພະຍົບໜີຈາກການສູ້ຮົບ
ແຫຼ່ງຂ່າວ: BBC Thai