ຈະມີມູນຄວາມຈິງ ຫຼື ເປັນພຽງຂ່າວລື ກໍຍັງບໍ່ມີໃຜສາມາດຢືນຢັນໄດ້ໃນເລື່ອງທີ່ກອງທັບຣັສເຊຍກຳລັງກຽມເປີດສົງຄາມກັບອູແກຣນ ອັນໄດ້ສ້າງຄວາມວິຕົກກັງວົນໃຫ້ແກ່ບັນດາຜູ້ນຳໂລກຕາເວັນຕົກ ລວມທັງອູແກຣນ.
ເວັບໄຊ ບີບີຊີ ລາຍງານ: ຄວາມວິຕົກກັງວົນດັ່ງກ່າວມີຂຶ້ນເພາະຢ້ານປະຫວັດສາດຊໍ້າຮອຍ ເມື່ອຢ້ອນກັບຄືນໄປຊ່ວງ 7 ປີກ່ອນ ໄດ້ເກີດວິກິດການໄຄຣເມຍ ເຊິ່ງຣັສເຊຍໄດ້ຢຶດ ແລະຮີບໂຮມດິນແດນທາງຄາບສະໝຸດໄຄຣເມຍ ຂອງອູແກຣນເຂົ້າເປັນຂອງຕົນເອງ ທັງສະໜັບສະໜູນໃຫ້ກຸ່ມກໍ່ກະບົດແບ່ງແຍກດິນແດນກັບລັດຖະບານອູແກຣນນຳອີກ ຂະນະທີ່ຄວາມຂັດແຍ່ງລະຫວ່າງ ກຸ່ມກໍ່ກະບົດທີ່ມີຣັສເຊຍໝູນຫຼັງກັບລັດຖະບານອູແກຣນ ໄດ້ແກ່ຍາວມາຈົນຮອດປັດຈຸບັນ ແຕ່ສິ່ງທີ່ໜ້າເປັນຫ່ວງຫຼາຍທີ່ສຸດນັ້ນກໍຄື ຣັສເຊຍໄດ້ເສີມກຳລັງພົນບໍລິເວນຊາຍແດນຣັສເຊຍ-ອູແກຣນ ເຊິ່ງໜ່ວຍຂ່າວກອງເຊື່ອວ່າ ອາດມີທະຫານເຖິງ 1 ແສນຄົນ.
ເຈົ້າໜ້າທີ່ລະດັບສູງໃນໜ່ວຍຂ່າວກອງລະບຸວ່າ ຫາກຣັສເຊຍເປີດສົງຄາມກັບອູແກຣນແທ້ ກໍຈະເຮັດໃຫ້ປະຊາຊົນຈຳນວນຫຼາຍເສຍຊີວິດ ຫຼື ອົບພະຍົບໜີ ເນື່ອງຈາກບົດຮຽນຄັ້ງຜ່ານມາ ຄືຊ່ວງປີ 2014 ໂດຍມີການສູ້ຮົບຢູ່ທາງພາກຕາເວັນອອກຂອງອູແກຣນ ເຮັດໃຫ້ປະຊາຊົນຜູ້ບໍລິສຸດເສຍຊີວິດ 14 ພັນຄົນ ແລະອົບພະຍົບໜີປະມານ 1.4 ລ້ານຄົນ.
ຢ່າງໃດກໍຕາມ, ຣັສເຊຍພະຍາຍາມປະຕິເສດພາບຖ່າຍຈາກຈານດາວທຽມ ໂດຍອ້າງວ່າພາບທີ່ເຜີຍໃຫ້ເຫັນການເສີມກຳລັງທະຫານໃນໄຄຣເມຍ ແລະຈຸດທີ່ຢູ່ບໍ່ໄກຈາກພາກຕາເວັນອອກຂອງອູແກຣນນັ້ນເປັນເລື່ອງຕື່ນຕູມເກີນເຫດ ພ້ອມອ້າງຕື່ມເລື່ອງຂ່າວທີ່ທາງຣັສເຊຍຈະບຸກໂຈມຕີອູແກຣນໃນໄວໆນີ້ ກໍບໍ່ແມ່ນເລື່ອງຈິງ.