ວັນທີ 9 ທັນວາ 2021, ສຳນັກຂ່າວຕ່າງປະເທດລາຍງານວ່າ ນິວຊີແລນມີແຜນຈະອອກກົດໝາຍຫ້າມຄົນທີ່ເກີດຫຼັງປີ 2008 ຊື້ຢາສູບ ຫຼື ຜະລິດຢາສູບຕະຫຼອດຊີວິດ. ຄາດວ່າຈະມີຜົນບັງຄັບໃຊ້ພາຍໃນປີ 2022.
ລັດຖະມົນຕີກະຊວງສາທາລະນະສຸກນິວຊີແລນ ທ່ານ ດຣ Ayisa Verral ກ່າວວ່າ: “ພວກເຮົາຕ້ອງການໃຫ້ແນ່ໃຈວ່າຄົນຮຸ່ນໃໝ່ຈະເລີ່ມຕົ້ນບໍ່ສູບຢາເລີຍ. ສະນັ້ນ, ພວກເຮົາຈຶ່ງເຮັດໃຫ້ມັນຜິດກົດໝາຍທີ່ຈະຂາຍ ຫຼື ສະໜອງຜະລິດຕະພັນຢາສູບໃຫ້ກັບໄວໜຸ່ມ”
ແຜນການດັ່ງກ່າວເປັນສ່ວນໜຶ່ງຂອງນະໂຍບາຍຂອງລັດຖະບານ ເພື່ອຫຼຸດຜ່ອນອັດຕາການສູບຢາໃຫ້ຕໍ່າກວ່າ 5% ຂອງປະຊາກອນທັງໝົດ ພາຍໃນປີ 2025 ແລະ ເຮັດໃຫ້ນິວຊີແລນເປັນປະເທດທີ່ບໍ່ມີຢາສູບເລີຍ.
“ການສູບຢາແມ່ນໜຶ່ງໃນສາເຫດຕົ້ນຕໍ ຂອງການເສຍຊີວິດ ທີ່ສາມາດປ້ອງກັນໄດ້ໃນນິວຊີແລນ ແລະ ມັນເປັນສາເຫດຂອງມະເຮັງໃນອັດຕາສູງເຖິງຫນຶ່ງໃນສີ່” ທ່ານດຣ Verral ກ່າວ.
ນອກເຫນືອຈາກການຈໍາກັດອາຍຸຂອງຜູ້ສູບຢາ. ລັດຖະບານນິວຊີແລນຍັງຈະເພີ່ມຂໍ້ຈໍາກັດໃນດ້ານອື່ນໆເຊັ່ນ: ຫຼຸດຜ່ອນຈໍານວນຮ້ານທີ່ຂາຍຢາສູບລົງ, ຢາສູບຈະບໍ່ໄດ້ຖືກອະນຸຍາດໃຫ້ຂາຍໃນສັບພະສິນຄ້າ ແລະ ຮ້ານຂາຍເຄື່ອງຍ່ອຍ, ລວມທັງການກໍານົດປະລິມານສານ nicotine ສໍາລັບການຜະລິດເຂົ້າຢາສູບໃຫ້ຢູ່ໃນລະດັບຕໍ່າ ແລະ ເພີ່ມທະວີການຈຳກັດການໂຄສະນາຢາສູບໃຫ້ເຂັ້ມງວດຂຶ້ນ.
ເຖິງຢ່າງໃດກໍຕາມ, ນະໂຍບາຍດັ່ງກ່າວຂອງລັດຖະບານ ຈະໄດ້ຮັບການຍ້ອງຍໍຈາກບັນດາແພດໝໍ ແລະ ບັນດາຜູ້ຊ່ຽວຊານດ້ານສາທາລະນະສຸກໃນທົ່ວປະເທດ ເຫັນວ່າ ນິວຊີແລນຈະກາຍເປັນຜູ້ນໍາຂອງໂລກໃນການຄວບຄຸມການສູບຢາຢ່າງຈິງຈັງ, ແຕ່ກໍຍັງມີຫຼາຍຝ່າຍ ທີ່ໄດ້ສະແດງຄວາມກັງວົນວ່າ ການກໍານົດປະລິມານສານນິໂຄຕິນ ອາດເປັນພາລະຂອງຜູ້ມີລາຍໄດ້ຕ່ຳທີ່ຕ້ອງຈ່າຍຄ່າຢາສູບຫຼາຍຂຶ້ນ ເພື່ອຈະໄດ້ຮັບສານນິໂຄຕິນໃນປະລິມານດຽວກັນ ແລະ ອາດຈະເຮັດໃຫ້ເກີດບັນຫາ ການຈໍາໜ່າຍຢາສູບທີ່ຜິດກົດໝາຍເກີດຂຶ້ນຕາມມາ.
ອ້າງອີງ: Workpointtoday