ໃນທີ່ສຸດກໍຖືກຕັດອິດສະລະພາບສຳລັບ ທ່ານ ເປຣມໄຊ ການສູດ ໄວ 67 ປີ, ນັກທຸລະກິດຊື່ດັງໃນຖານະກຳມະການບໍລິສັດອີຕາລຽນໄທດີເວລ໊ອບເມັນຈຳກັດ ເມື່ອສານໃນປະເທດໄທໄດ້ພິພາກສາຈຳຄຸກ ຜູ້ກ່ຽວເປັນເວລາ 2 ປີ 14 ເດືອນ ພ້ອມທົດແທນຄ່າເສຍຫາຍ 2 ລ້ານບາດ ເຊິ່ງກ່ຽວຂ້ອງກັບຄະດີລ່າສັດປ່າ (ເສືອດຳ) ທີ່ເຄີຍເປັນຂ່າວໜ້າໜຶ່ງໃນໜັງສືພິມໄທຫຼາຍສະບັບ ໃນຊ່ວງປີ 2018 ຂະນະທີ່ຄົນຂັບລົດ ແລະນາຍພານທີ່ກ່ຽວຂ້ອງກັບຄະດີດັ່ງກ່າວ ກໍຖືກສານຕັດສິນຈຳຄຸກເຊັ່ນກັນ.

ຄະດີ “ເສືອດຳ” ຖືເປັນຄະດີໃຫຍ່ທີ່ໄດ້ຮັບຄວາມສົນໃຈຈາກສັງຄົມພໍສົມຄວນ ນັບແຕ່ມື້ເກີດເຫດການໃນວັນທີ 6 ກຸມພາ 2018 ເນື່ອງຈາກຈຳເລີຍ ເປຣມໄຊ ເປັນນັກທຸລະກິດຊື່ດັງ ພ້ອມທັງມີການເຜີຍແຜ່ພາບສັດປ່າທີ່ຖືກລ່າ ແລະ ຊຳແຫຼະສິ້ນສ່ວນ ໜຶ່ງໃນນັ້ນກໍຄື “ເສືອດຳ” ອັນໄດ້ສ້າງຄວາມຫົດຫູ່ໃຈພໍສົມຄວນ.

ສ່ວນຜູ້ຂັບລົດທີ່ກ່ຽວຂ້ອງກັບຄະດີເສືອດຳ ແມ່ນຖືກຕັດສິນຈຳຄຸກ 2 ປີ 17 ເດືອນ ແລະນາຍພານແມ່ນຖືກຕັດສິນຈຳຄຸກ 2 ປີ 21 ເດືອນ ຂະນະທີ່ແມ່ບ້ານຄົນໜຶ່ງເຊິ່ງມີສ່ວນກ່ຽວຂ້ອງກັບການປົກປິດຄະດີ ກໍຖືກຕັດສິນຈຳຄຸກ 1 ປີ 8 ເດືອນ ພ້ອມປັບໄໝ 4 ໝື່ນບາດໄທ.

ຂໍ້ມູນຈາກ: ເວັບໄຊ ບີບີຊີ