ນັກຮຽນມັດທະຍົມລາຍໜຶ່ງ, ໄວ 15 ປີ ໃຊ້ປືນບຸກຍິງຜູ້ຄົນໃນໂຮງຮຽນມັດທະຍົມອ໊ອກຊ໌ຟອດ, ໃນລັດມິຊິແກນ, ສະຫະລັດອາເມລິກາ ເຮັດໃຫ້ມີນັກຮຽນເສຍຊີວິດ 3 ຄົນ, ບາດເຈັບ 8 ຄົນ ໃນນັ້ນມີຄູລວມຢູ່ນຳ.
ອີງຕາມການລາຍງານຂອງເວັບໄຊ OXFORD, Mich. (FOX 2), ເຫດການລະທຶກຂວັນດັ່ງກ່າວ ເກີດຂຶ້ນໃນວັນທີ 30 ພະຈິກຜ່ານມາ ເປັນເຫດເຮັດໃຫ້ນັກຮຽນມັດທະຍົມສາມຄົນ, ໄວ 14, 16 ແລະ 17 ປີ ເສຍຊີວິດຈາກເຫດການບຸກຍິງຄັ້ງນີ້ ແລະມີເຫຍື່ອອີກ 8 ລາຍລວມທັງຄູໄດ້ຮັບບາດເຈັບ ເຊິ່ງຜູ້ຕ້ອງສົງໄສແມ່ນນັກຮຽນມັດທະຍົມຊັ້ນປີທີສອງ ໂດຍທີ່ທາງການຂໍສະຫງວນສິດບໍ່ເປີດເຜີຍລາຍລະອຽດເພີ່ມເຕີມໃດໆກ່ຽວກັບຜູ້ຕ້ອງຫາຄົນດັ່ງກ່າວ ເນື່ອງຈາກຜູ້ກໍ່ເຫດຍັງຢູ່ໃນໄວອາຍຸບໍ່ເຖິງ 18 ປີ.
ເຈົ້າໜ້າທີ່ຕຳຫຼວດກ່າວວ່າ ໄດ້ຮັບສາຍໂທລະສັບທີ່ໂທເຂົ້າເບີສຸກເສີນ 911 ປະມານ 100 ກວ່າສາຍ ໃນຊ່ວງຕອນທ່ຽງຂອງມື້ເກີດເຫດ ຂະນະທີ່ເຈົ້າໜ້າທີ່ໄດ້ໃຊ້ກຳລັງລົງພື້ນທີ່ເພື່ອຄວບຄຸມສະຖານະການແບບຮີບດ່ວນ ກ່ອນຈະເຂົ້າຈັບກຸມຕົວຜູ້ຕ້ອງສົງໄສ ພ້ອມຂອງກາງ ປືນພົກ ຂະໜາດ 9 ມມ ທີ່ບັນຈຸລູກປືນ 7 ລູກ.