ແຫຼ່ງຂາ່ວຣອຍເຕີລາຍງານວ່າ:  ທ່ານ ນາງ ມັກດາເລນາ ອັນເດີຊອນ, ນາຍົກລັດຖະມົນຕີຍິງຄົນທຳອິດຂອງສະວີເດັນ ໄດ້ຮັບການແຕ່ງຕັ້ງດຳລົງຕຳແໜ່ງນາຍົກລັດຖະມົນຕີຄືນໃໝ່ອີກຄັ້ງ ພາຍຫຼັງປະກາດລາອອກໃນອາທິດຜ່ານມາ ທ່າມກາງຄວາມກົດດັນຈາກການເລືອກຕັ້ງ ແລະຄວາມວຸ້ນວາຍທາງການເມືອງ.

ໃນຊ່ວງອາທິດຜ່ານມາ, ທ່ານ ນາງ ມັກດາເລນາ ອັນເດີຊອນ ໄດ້ປະກາດລາອອກຈາກຕຳແໜ່ງນາຍົກລັດຖະມົນຕີ ພາຍຫຼັງໄດ້ຮັບການແຕ່ງຕັ້ງຢ່າງເປັນທາງໄດ້ບໍ່ຮອດ 24 ຊົ່ວໂມງ ໂດຍໃຫ້ຄຳເຫັນວ່າ ບໍ່ຕ້ອງການເປັນຜູ້ນຳລັດຖະບານທີ່ມີຂໍ້ຂັດແຍ່ງໃນເລື່ອງຄວາມຊອບທຳຕາມກົດໝາຍ ເຊິ່ງນາຍົກຍິງ ໄວ 54 ປີຄົນດັ່ງກ່າວ, ແມ່ນເປັນຫົວໜ້າພັກສັງຄົມນິຍົມປະຊາທິປະໄຕຂອງສະວີເດັນ ໄດ້ຮັບຄະແນນເລືອກຕັ້ງຈາກການໂຫວດຮັບຮອງໃນສະພາ 174 ສຽງ ຈາກທັງໝົດ 349 ສຽງ ກ່ອນກ້າວຂຶ້ນດຳລົງຕຳແໜ່ງນາຍົກຍິງຄົນທຳອິດຂອງສະວີເດັນເຮັດໃຫ້ຝ່າຍກົງກັນຂ້າມພາກັນຄັດຄ້ານ ນຳໄປສູ່ການປະກາດລາອອກດ້ວຍຄວາມສະໝັກໃຈ.

ຫຼ້າສຸດ ຝ່າຍນິຕິບັນຍັດຂອງສະວີເດັນໄດ້ມີການລົງມະຕິຄັດເລືອກນາຍົກລັດຖະມົນຕີຄືນໃໝ່ເປັນຄັ້ງທີສອງ ໂດຍມີເວລາບໍ່ເຖິງໜຶ່ງອາທິດ ກ່ອນເຫັນດີແຕ່ງຕັ້ງ ທ່ານ ນາງ ມັກດາເລນາ ອັນເດີຊອນ ເປັນນາຍົກລັດຖະມົນຕີສະວີເດັນຄືນໃໝ່ອີກຄັ້ງ.