“ກຸນເທີ ທີ 4” ໝາພັນເຢຍລະມັນເຊເພິດ ອາໄສຢູ່ໃນ ໄມອາມີ, ສະຫະລັດອາເມລິກາ ເປັນໝາທີ່ລໍ້າລວຍທີ່ສຸດຂອງໂລກ ໂດຍມີຊັບສິນປະມານ 375 ລ້ານໂດລາສະຫະລັດ ໂດຍໄດ້ຮັບມໍລະດົກສືບທອດຈາກພໍ່ຂອງມັນ ເຊິ່ງເຄີຍເປັນອະດີດໝາທີ່ລວຍທີ່ສຸດຂອງໂລກ, ອາໄສຢູ່ຄະລືຫາດຫຼູ ພ້ອມເປັນຊີອີໂອ ບໍລິສັດ ກຸນເທີ ຄໍເປີເຣຊັ່ນ.

ໝາເສດຖີດັ່ງກ່າວອາໄສຢູ່ຄະລືຫາດຫຼູລາຄາ 7.5 ລ້ານໂດລາ ທີ່ຊື້ ໃນປີ 2000 ຈາກ ມາດອນນາ, ສິລະປິນຍິງລະດັບໂລກ, ມັນມີຄົນຮັບໃຊ້ ແລະຜູ້ດູແລຄວາມປອດໄພຕະຫຼອດ 24 ຊົ່ວໂມງ ພ້ອມກິນອາຫານດີໆລາຄາແພງ, ແລະຍັງມີບໍລິສັດເປັນຂອງໂຕເອງ ໂດຍພະນັກງານໃນບໍລິສັດມີໜ້າທີ່ຈັດການບໍລິຫານຊັບສິນຂອງມັນໃຫ້ອອກຜົນນຳອີກ.

“ກຸນເທີ ທີ 4” ໃຊ້ເວລາສ່ວນໃຫຍ່ຢູ່ຫ້ອງນອນ ແລະສະລອຍນໍ້າສ່ວນຕົວ ພ້ອມມັກການເດີນທາງທ່ອງທ່ຽວເປັນຊີວິດຈິດໃຈ ຂະນະທີ່ພື້ນທີ່ສ່ວນໜຶ່ງຂອງເຮືອນມັນ ແມ່ນເປີດໃຫ້ເຊົ່າສຳລັບຖ່າຍທຳໜັງ ແລະລາຍການໂທລະພາບ. ຢ່າງໃດກໍຕາມ, ເຖິງແມ່ນສັດຈະບໍ່ສາມາດເປັນເຈົ້າຂອງຊັບສິນໄດ້ໂດຍກົງ ແຕ່ມັນສາມາດເປັນເຈົ້າຂອງຊັບສິນຜ່ານກອງທຶນທຣັສສັດລ້ຽງ (Pet Trust) ທີ່ເຂົ້າມາດູແລຜົນປະໂຫຍດແທນໄດ້.

ຂໍ້ມູນຈາກ: ເວັບໄຊ Petmaya