ວັດເກົ່າແກ່ແຫ່ງໜຶ່ງໃນຍີ່ປຸ່ນ ໄດ້ນຳເອົາຫຸ່ນຍົນ ຫຼື ນັກບວດແອນດຣອຍ ພາຍໃຕ້ຊື່ “ມິນດ້າ” ເພື່ອໃຊ້ໃນການເທສະໜາ ເຊິ່ງສ້າງຄວາມສົນໃຈໃຫ້ແກ່ຊາວໂລກ ເນື່ອງຈາກຫຼາຍຄົນໃຫ້ຂໍ້ສັງເກດວ່າ ນັກບວດແອນດຣອຍຮູບດັ່ງກ່າວ ຈະສາມາດກະຕຸ້ນຄວາມສົນໃຈໃນທາງພຸດທະສາສະໜາໄດ້ ຫຼື ບໍ່?.

ຕາມການລາຍງານຂ່າວຂອງເວັບໄຊ ຢູເອັນເອັນ: ວັດເກົ່າແກ່ຂອງຍີ່ປຸ່ນ ທີ່ມີອາຍຸປະມານ 400 ປີ ໄດ້ນຳເອົາຫຸ່ນຍົນ “ມິນດ້າ” ມານຳໃຊ້ເພື່ອເທສະໜາ ເຊິ່ງຫຸ່ນຍົນດັ່ງກ່າວ ໄດ້ຈຳລອງຕາມພະໂພທິສັດ ລວມທັງເຈົ້າແມ່ກວນອິມ ໂດຍມີຄວາມສາມາດໃນການພົບປະກັບຜູ້ຄົນຈຳນວນຫຼາຍ ພ້ອມສາມາດເກັບກຳຂໍ້ມູນຈຳນວນຫຼາຍໄດ້ ແລະຍັງສາມາດພັດທະນາຕະຫຼອດເຖິງແມ່ນການເວລາຈະຜ່ານໄປກໍຕາມ.

“ມິນດ້າ” ໄດ້ຮັບການພັດທະນາ ພາຍໃຕ້ການຮ່ວມມືລະຫວ່າງ ວັດໂຄໄດຈິ ແລະສາສະດາຈານດ້ານວິທະຍາການຫຸ່ນຍົນ ຈາກມະຫາວິທະຍາໄລໂອຊາກ້າ ໂດຍມີຄ່າໃຊ້ຈ່າຍປະມານ 1 ລ້ານໂດລາສະຫະລັດ ຫຼື ປະມານ 11 ຕື້ກວ່າກີບ, ພະດັ່ງກ່າວມີລວງສູງ 195 ຊມ ສ້າງຈາກອາລູມີນຽມເປັນສ່ວນໃຫຍ່ ສ່ວນ ມື, ໃບໜ້າ ແລະບ່າໄຫຼ່ ແມ່ນຫຸ້ມດ້ວຍຊີລີໂຄນ ເພື່ອໃຫ້ເບິ່ງຄືກັບວ່າເປັນຜິວໜັງຂອງມະນຸດ, ເຊິ່ງຫຸ່ນຍົນຕົວນີ້ ຖືກຕັ້ງໂປຣແກຣມໃຫ້ສະແດວເທສະໜາ 25 ນາທີ ກ່ຽວກັບພະສູດທີ່ເປັນຄຳພີຂອງສາສະໜາພຸດ.