ໃນວັນທີ 19 ພະຈິກ 2021 ທີ່ຜ່ານມາ ສໍານັກ ຂ່າວຕ່າງປະເທດ ໄດ້ລາຍງານວ່າ ສໍານັກງານຄວບຄຸມເຂດແດນຂອງເບລາຣຸສໄດ້ມີການຮື້ຖອນຄ້າຍອົບພະຍົບຂະໜາດໃຫຍ່ທີ່ສຸດທີ່ຕັ້ງຢູ່ທາງພາກຕາເວັນຕົກສ່ຽງໃຕ້ຂອງປະເທດທີ່ຕິດກັບເຂດແດນຂອງປະເທດໂປແລນ ແລ້ວສົ່ງຜູ້ອົບພະຍົບຊາວອີຣັກປະມານ 430 ຄົນ ໃຫ້ເດີນທາງກັບດ້ວຍເຄື່ອງບິນ.
ເຖິງວ່າຕອນນີ້ສະຖານະການຄວາມຕຶງຄຽດລະຫວ່າງຊາຍແດນຂອງສອງປະເທດຈະເລີ່ມມີການຜ່ອນຄາຍລົງ ແຕ່ທາງດ້ານຄະນະກໍາມະການເອີຣົບ ເຊິ່ງເປັນຝ່າຍບໍລິຫານຂອງສະຫະພາບເອີຣົບ ໄດ້ປະຕິເສດຂໍ້ສະເໜີຂອງປະທານາທິບໍດີອາເລັກຊານເດີ ຜູ້ນໍາຂອງປະເທດເບລາຣຸສ ໃນການຂໍໃຫ້ສະມາຊິກ EU ທັງໝົດ 27 ປະເທດ ຮ່ວມກັນຮັບເອົາຜູ້ອົບພະຍົບທີ່ຍັງຕົກຄ້າງຢູ່ປະມານ 2,000 ຄົນ ແລະ ລັດຖະບານເບລາຣຸສກໍຈະຜັກດັນຜູ້ອົບພະຍົບໃຫ້ກັບພູມລໍາເນົາເດີມເພີ່ມອີກ 5,000 ຄົນ.
ທັງນີ້ສະຫະພາບເອີຣົບໄດ້ຄວໍ້າບາດ ທ່ານ ທ່ານລູຄາເຊນໂກ ແລະ ເຈົ້າໜ້າທີ່ລະດັບສູງຂອງລັດຖະບານເບລາຣຸສອີກຫຼາຍຄົນທີ່ມີເຈດຕະນາສ້າງສະຖານະການຕຶງຄຽດຕາມເຂດຊາຍແດນທີ່ຕິດກັບປະເທດໂປຣແລນ ເຊິ່ງຖືເປັນ ເຂດພົມແດນຕາເວັນອອກສຸດ ຂອງທະວີບເອີຣົບທີ່ມີຄວາມຕຶງຄຽດຢືດເຍື້ອຍາວນານມາຫຼາຍເດືອນ ແລະ ມີຜູ້ອົບພະຍົບເສຍຊີວິດແລ້ວຢ່າງໜ້ອຍ 11 ຄົນ ໂດຍທາງການຂອງ EU ເບິ່ງວ່າເຫດການນີ້ເປັນການເອົາຄືນໃນກໍລະນີທີ່ EU ເຄີຍຄວໍ້າບາດທ່ານລູຄາເຊນໂກຄັ້ງທໍາອິດໃນປີທີ່ແລ້ວຈາກຄວາມຂັດແຍ່ງເລືອງການເລືອກຕັ້ງປະທານາທິບໍດີຂອງເບລາຣຸາ ເຊິ່ງ ທ່ານລູຄາເຊນໂກ ຊະນະເປັນສະໄໝທີ່ 6 ຕິດຕໍ່ກັນ ແຕ່ຫຼາຍປະເທດບໍ່ຍອມຮັບ ແລະ ປະນາມວ່າເປັນການທຸຈະລິດໃນການເລືອກຕັ້ງ.