ວັນທີ 17 ພະຈິກ 2021 ສໍານັກຂ່າວ Komchadluek ລາຍງານວ່າ ລັດຖະມົນຕີກະຊວງສາທາລະນະສຸກສີລັງກາ ກ່າວວ່າ ເມື່ອບໍ່ດົນມານີ້ ລັດຖະບານໄດ້ອະນຸມັດການໃຊ້ຢາ molnupiravir ເປັນຄັ້ງທຳອິດເພື່ອປິ່ນປົວພະຍາດ ໂຄວິດ-19 ແບບກິນຊະນິດທໍາອິດ ສໍາລັບການປິ່ນປົວຜູ້ປ່ວຍ ໂຄວິດ-19 ພາຍໃນປະເທດ
ສື່ທ້ອງຖິ່ນໄດ້ອ້າງວ່າ ລັດຖະມົນຕີກະຊວງການຜະລິດ ແລະ ຄວບຄຸມຢາ Janna Jayasumana ໄດ້ກ່າວວ່າ ຢາເມັດ molnupiravir ໄດ້ຖືກພັດທະນາໂດຍບໍລິສັດ Merck Sharp and Dohm (MSD) ແລະ Ridgeback Biotherapeutics ບໍລິສັດຢາຂອງສະຫະລັດ ໄດ້ຮັບການອະນຸມັດຈາກຄະນະກໍາມະການດ້ານວິຊາການທາງດ້ານພະຍາດ ໂຄວິດ-19 ແລະ ຜູ້ຊຽວຊານດ້ານການແພດຂອງສີລັງກາ ໂດຍຢາດັ່ງກ່າວ ຈະຊ່ວຍຫຼຸດຜ່ອນຄວາມສ່ຽງຕໍ່ການເຂົ້າປິ່ນປົວໃນໂຮງໝໍ ແລະ ການເສຍຊີວິດ 50 ສ່ວນຮ້ອຍ.
Jayasumana ກ່າວວ່າ ຄະນະກໍາມະການອະນຸມັດການນໍາໃຊ້ຢາ Molnupiravir ໃນການປິ່ນປົວຜູ້ຕິດເຊື້ອ ໂຄວິດ-19 ຕາມການຮ້ອງຂໍຂອງເຂົາເຈົ້າ ແລະ ເພີ່ມວ່າ ຢາດັ່ງກ່າວຈະຖືກລົງທະບຽນຢູ່ໃນສີລັງກາໃນອະນາຄົດ ເພື່ອແຈກຢາຍໃຫ້ຜູ້ທີ່ຕິດເຊື້ອໄວຣັສ.
ສະຖິຕິຂອງກະຊວງສາທາລະນະສຸກສະແດງໃຫ້ເຫັນວ່າ ສີລັງກາມີຜູ້ຕິດເຊື້ອພະຍາດ ໂຄວິດ-19 ສະສົມ 552,274 ຄົນ ແລະ ມີຜູ້ເສຍຊີວິດ 14,016 ຄົນ ນັບແຕ່ເດືອນມີນາປີກາຍນີ້.