ແພດປະຈຳໂຮງໝໍເມັສຊາຊູເຊັສ ເຈເນີຣັລ, ສະຫະລັດອາເມລິກາ ກວດພົບແມ່ທ້ອງແປຫຼາຍຮ້ອຍໂຕຟັກຕົວໃນສະໝອງຄົນໄຂ້ລາຍໜຶ່ງ ພາຍຫຼັງຜູ້ປ່ວຍລາຍນີ້ເຂົ້າປິ່ນປົວຢູ່ໂຮງໝໍເນື່ອງຈາກມີອາການຊັກໂດຍບໍ່ຮູ້ສາເຫດ.
ອີງຕາມການລາຍງານຂອງເວັບໄຊ Foxnews: ຊາຍໄວ 38 ປີ ເຊິ່ງອົບພະຍົບມາຈາກເຂດຊົນນະບົດຂອງປະເທດກົວເຕມາລາ ເກີດອາການຊັກກະທັນຫັນ ໂດຍບໍ່ຮູ້ສາເຫດ ເນື່ອງຈາກຜ່ານມາແມ່ນດຳລົງຊີວິດປົກກະຕິ ແລະມີສຸຂະພາບແຂງແຮງ ຂະນະທີ່ທ່ານໝໍໄດ້ຮີບຮ້ອນກວດຫາສາເຫດຂອງອາການຊັກຫຼາຍວິທີ ບໍ່ວ່າຈະເປັນພາວະນໍ້າຕານໃນເລືອດ, ໝາກໄຂ່ຫຼັງ, ຕັບ ແລະອື່ນໆ ປາກົດວ່າບໍ່ພົບຄວາມຜິດປົກກະຕິໃດໆ ແຕ່ທ່ານໝໍກໍສຸມທຸກຄວາມພະຍາຍາມໃນການຊອກຫາສາເຫດຈົນພົບວ່າ ໃນສະໝອງຂອງຄົນເຈັບມີແມ່ທ້ອງແປຟັກຕົວຢູ່ເປັນເວລາຫຼາຍສິບປີ.
ຜູ້ຊ່ຽວຊານປະຈຳໂຮງໝໍເມັສຊາຊູເຊັສ ເຈເນີຣັລ ກ່າວວ່າ ຄົນໄຂ້ລາຍນີ້ມີແມ່ທ້ອງຟັກຕົວຢູ່ໃນສະໝອງເນື່ອງມາຈາກບໍລິໂພກຊີ້ນໝູດິບເປັນປະຈຳ.