ອີງຕາມການລາຍງານຂອງສຳນັກຂ່າວ CRI: ທ່ານ ສີຈີ້ນຜິງ, ປະທານປະເທດຈີນ ໄດ້ພົບປະກັບທ່ານ ໂຈໄບເດັນ, ປະທານາທິບໍດີ ອາເມຣິກາ ດ້ວຍຮູບແບບຜ່ານທາງວິດີໂອ, ການພົບປະດັ່ງກ່າວຈັດຂຶ້ນໃນ ວັນທີ 16 ພະຈິກຜ່ານມາ ເຊິ່ງຜູ້ນຳສອງປະເທດໄດ້ມີການປຶກສາຫາລືກັນຫຼາຍປະເດັນ.
ທ່ານ ສີຈິ້ນຜິງ ກ່າວວ່າ: ການຊຸກຍູ້ສາຍພົວພັນຈີນ ແລະອາເມຣິກາ ທີ່ຕ່າງຝ່າຍຕ່າງໄດ້ຮັບການພັດທະນາ ແລະປົກປັກຮັກສາສະພາບແວດລ້ອມສາກົນ ທີ່ມີ ສັນຕິພາບ ແລະສະຖຽນລະພາບ ພ້ອມທັງ ການຮັບມືກັບສິ່ງທ້າທາຍຂອງທົ່ວໂລກ ເຊິ່ງລວມທັງການປ່ຽນແປງຂອງດິນຟ້າອາກາດ ແລະການແຜ່ລະບາດຂອງພະຍາດ ໂຄວິດ-19 ລ້ວນແຕ່ຕ້ອງການສາຍພົວພັນຈີນ-ອາເມຣິກາ ທີ່ປອດໃສ ແລະ ໝັ້ນທ່ຽງ, ຈີນ ແລະ ອາເມຣິກາ ຄວນເຄົາລົບເຊິ່ງກັນແລະກັນ, ຢູ່ຮ່ວມກັນໂດຍສັນຕິ, ດຳເນີນການຮ່ວມມືເພື່ອຕ່າງຝ່າຍຕ່າງໄດ້ຮັບຜົນປະໂຫຍດ. ຂ້າພະເຈົ້າຍິນດີຮ່ວມກັບທ່ານ ປະທານາທິບໍດີ ໂຈໄບເດັນ, ສ້າງຄວາມຮັບຮູ້ທີ່ຄ້າຍຄືກັນ ປະຕິບັດງານຢ່າງຕັ້ງໜ້າ. ນີ້ ແມ່ນຄວາມຕ້ອງການທີ່ສ້າງຄວາມສຸກໃຫ້ແກ່ ປະຊາຊົນສອງປະເທດ ທັງແມ່ນຄວາມຫວັງຂອງປະຊາຄົມໂລກ.
ຂະນະທີ່ທ່ານ ໂຈໄບເດັນ ກໍໄດ້ກ່າວວ່າ: ຂ້າພະເຈົ້າດີໃຈທີ່ໄດ້ມີໂອກາດພົບປະກັບທ່ານ. ຫວັງວ່າ ການສົນທະນາລະຫວ່າງພວກເຮົາຈະສາມາດດຳເນີນໄປແບບກົງໄປກົງມາ, ຂ້າພະເຈົ້າເຫັນວ່າ ໃນຖານະເປັນຜູ້ນຳຂອງປະເທດຈີນ ແລະ ອາເມຣິກາ, ພວກເຮົາມີຄວາມຮັບຜິດຊອບ ແລະຮັບປະກັນວ່າ ການແຂ່ງຂັນລະຫວ່າງສອງປະເທດຈະບໍ່ກ້າວໄປສູ່ການປະທະກັນ, ບໍ່ວ່າຈະເປັນການກະທຳທີ່ມີເຈຕະນາ ຫຼື ບໍ່ກໍຕາມ. ຂ້າພະເຈົ້າເຫັນວ່າ ພວກເຮົາຕ້ອງການສ້າງຄວາມຮັບຮູ້ທີ່ເປັນເອກະພາບກັນຄືນໃໝ່, ແກ້ໄຂຄວາມຂັດແຍ່ງກັນ ລະຫວ່າງພວກເຮົາຢ່າງກົງໄປກົງມາ, ສຸມຄວາມພະຍາຍາມຮ່ວມກັນໃນບັນຫາທີ່ພົວພັນເຖິງຜົນປະໂຫຍດຮ່ວມກັນ, ໂດຍສະເພາະໃນບັນຫາດ້ານການ ປ່ຽນແປງຂອງດິນຟ້າອາກາດຂອງໂລກ ກໍຄືບັນຫາທີ່ມີລັກສະນະທົ່ວໂລກ ແລະອື່ນໆ. ການພົວພັນລະຫວ່າງສອງປະເທດພວກເຮົາ, ບໍ່ພຽງແຕ່ມີຜົນສະທ້ອນທີ່ສຳຄັນຕໍ່ກັບສອງປະເທດພວກເຮົາເທົ່ານັ້ນ, ແຕ່ຍັງມີຜົນສະທ້ອນຕໍ່ທົ່ວໂລກນຳອີກ.