ຫຼາຍຄົນອາດຄິດວ່າການເຂົ້ານອນໄວ ຄວນຈະເກີດຂຶ້ນແຕ່ກັບເດັກນ້ອຍເທົ່ານັ້ນ ແຕ່ຜົນການວິໄຈໃໝ່ ຈາກເວັບໄຊ້ Studyfinds ໄດ້ເປີດເຜີຍວ່າ ໃນໄວຜູ້ໃຫຍ່ກໍຄວນເຂັ້ມງວດກັບການເຂົ້ານອນຂອງຕົນເອງເຊັ່ນກັນ ນັກວິໄຈພົບວ່າ ການເຂົ້ານອນລະຫຫວ່າງເວລາ 22:00 – 23:00 ແມ່ນສາມາດຫຼຸດຄວາມສ່ຽງຂອງການເກີດພະຍາດຫົວໃຈໄດ້, ໃນຂະນະທີ່ການເຂົ້ານອນຫຼັງທ່ຽງຄືນແມ່ນຈະສົ່ງຜົນຕໍ່ກັບສຸຂະພາບຂອງຫົວໃຈຫຼຸດລົງ.
ດຣ David Plans ຜູ້ຂຽນບົດລາຍງານການສຶກສາຈາກມະຫາວິທະຍາໄລ Exeter ກ່າວວ່າ ຮ່າງກາຍຂອງຄົນເຮົາມີເວລາ 24 ຊົ່ວໂມງຕໍ່ມື້ ເຊິ່ງເອີ້ນວ່າຈັງຫວະຊີວິດ ໂດຍຊ່ວຍຄວບຄຸມການເຮັດວຽກຂອງຮ່າງກາຍ ແລະ ຈິດໃຈ, ການເຂົ້ານອນໄວ ຫຼື ຊ້ານັ້ນອາດມີທ່າອຽງໃນການສົ່ງຜົນຕໍ່ສຸຂະພາບຫົວໃຈ ແລະ ຫຼອດເລືອດໄດ້. ເຖິງຢ່າງໃດກໍຕາມ, ການສຶກສາດັ່ງກ່າວກໍຍັງບໍ່ມີຜົນທີ່ແນ່ນອນເທື່ອ.
ຜູ້ທີ່ນອນຫຼັງທ່ຽງຄືນ ຈະມີໂອກາດເປັນພະຍາດຫົວໃຈສູງເຖິງ 25% ເມື່ອທຽບກັບຜູ້ທີ່ນອນຫຼັບກ່ອນເວລາ 23:00 ພວກເຂົາຄົ້ນພົບວ່າເວລາໃນການນອນກັບພະຍາດຫົວໃຈຈະເກີດຂຶ້ນກັບຜູ້ຊາຍໄດ້ຫຼາຍກວ່າຜູ້ຍິງ, ຢ່າງໃດກໍຕາມ ນັກວິໄຈຍັງພົບວ່າ ຜູ້ຊາຍທີ່ເຂົ້ານອນໄວກວ່າ 22:00 ໂມງ ຍັງສະແດງຄວາມສ່ຽງຕໍ່ພະຍາດຫົວໃຈ ແລະ ຫຼອດເລືອດສູງຂຶ້ນ.
ເວົ້າລວມແລ້ວ ການນອນຫຼັບທີ່ດີ ຄືການດູແລຮ່າງກາຍຂັ້ນພື້ນຖານ ທີ່ເປັນເປົ້າໝາຍອັນສໍາຄັນທາງດ້ານສາທລະນະສຸກ ແລະ ເປັນວິທີງ່າຍໆໃນການຫຼຸດຜ່ອນຄວາມສ່ຽງຕໍ່ພະຍາດຫົວໃຈທີ່ເຮົາສາມາດເຮັດໄດ້.