ສຳນັກຂ່າວ Reuters ລາຍງານ: ບໍລິສັດໄຟເຊີ ໜຶ່ງບໍລິສັດຜະລິດວັກຊີນ ແລະ ຢາເມັດຕ້ານພະຍາດໂຄວິດ-19 ທີ່ທົ່ວໂລກກຳລັງຈັບຕາມອງ ຢືນຢັນວ່າ ຢາຕ້ານໄວຣັສໄຟເຊີສາມາດຊ່ວຍລົດຄວາມສ່ຽງຮຸນແຮງຂອງການຕິດເຊື້ອໂຄວິດ-19 ໄດ້ເຖິງ 89%.

ຢາເມັດໄຟເຊີໄດ້ຮັບການພັດທະນາເກືອບສອງປີກ່ອນຈະສຳເລັດ ເຊິ່ງຜົນການທົດລອງຊີ້ໃຫ້ເຫັນວ່າ ຢາຂອງໄຟເຊີ້ແຊງໜ້າຢາເມັດ ມອລນູພິຣາເວຍ ຂອງບໍລິສັດເມິກຄ໌ ແລະຄາດວ່າຢາເມັດດັ່ງກ່າວຈະຖືກຮັບຮອງຈາກອົງການອາຫານ ແລະຢາຂອງສະຫະລັດພາຍໃນທ້າຍປີນີ້ ຂະນະທີ່ປັດຈຸບັນ ບໍລິສັດໄຟເຊີກຳລັງຫາລືກັບ 90 ປະເທດກ່ຽວກັບສັນຍາການຈັດຫາຢາປົວພະຍາດໂຄວິດ-19.

ທ່ານ ອັນເບີດ ບູຣ໌ລາ, ປະທານຝ່າຍບໍລິຫານບໍລິສັດໄຟເຊີກ່າວວ່າ: ໄຟເຊີຄາດວ່າຈະກຳນົດລາຄາການປິ່ນປົວທີ່ໃກ້ຄຽງກັບບໍລິສັດເມິກຄ໌ສຳລັບປະເທດທີ່ມີລາຍໄດ້ສູງ, ເຊິ່ງລາຄາຕາມສັນຍາຂອງເມິກຄ໌ໃນສະຫະລັດຢູ່ທີ່ປະມານ 700 ໂດລາສະຫະລັດສຳລັບການປິ່ນປົວ 5 ວັນ, ແຕ່ທາງບໍລິສັດໄຟເຊີກຳລັງພິຈາລະນາສຳລັບປະເທດທີ່ມີລາຍໄດ້ຕໍ່າ ເພື່ອຊ່ວຍໃຫ້ທຸກຄົນສາມາດເຂົ້າເຖິງການປິ່ນປົວດ້ວຍຢາໄຟເຊີໄດ້.

ຢ່າງໃດກໍຕາມ, ຜູ້ຊ່ຽວຊານກໍໄດ້ໃຫ້ຄຳເຫັນວ່າ: ເຖິງແມ່ນຈະມີສັກກາຍະພາບຂອງຢາເມັດໄຟເຊີ ແລະ ເມິກຄ໌ກໍຕາມ, ການປ້ອງກັນການຕິດເຊື້ອດ້ວຍການສັກວັກຊີນຍັງຄົງແມ່ນວິທີການທີ່ດີທີ່ສຸດໃນການຄວບຄຸມການແຜ່ລະບາດຂອງພະຍາດໂຄວິດ-19 ທີ່ພາກຊີວິດຜູ້ຄົນທົ່ວໂລກໄປແລ້ວ 5 ລ້ານກວ່າຄົນໃນປັດຈຸບັນ.