ເວັບໄຊ USA Today ລາຍງານ: “ດັ໊ກ” ມັນຝຣັ່ງຍັກໜ້າຕາອັບປະລັກ ມີນໍ້າໜັກ 17.4 ປອນ ຫຼື ປະມານ 7.8 ກິໂລກຼາມ ຖືກຄົ້ນພົບໃນສວນແຫ່ງໜຶ່ງໃນປະເທດນິວຊີແລນ ເຊິ່ງຄາດວ່າເປັນມັນຝຣັ່ງໃຫຍ່ສຸດຂອງໂລກ ພ້ອມກຽມສະເໜີຊື່ເຂົ້າໃນກິນເນັດບຸກ.
ຄໍລິນ ກັບດອນນາ ເຈົ້າຂອງສວນ ທັງເປັນຜູ້ຄົ້ນພົບມັນຝຣັ່ງຍັກດັ່ງກ່າວ ເປີດເຜີຍວ່າ: ທັງສອງກຳລັງພາກັນກຳຈັດຫຍ້າໃນສວນ ແລະແລ້ວປາຍສຽມກໍໄປກະແທກກັບສິ່ງໜຶ່ງໃນພືນດິນ ທັງຄູ່ໄດ້ໃຊ້ສຽມຂຸດອ້ອມຮອບວັດຖຸດັ່ງກ່າວຈິ່ງພົບວ່າເປັນມັນຝຣັ່ງຂະໜາດໃຫຍ່ທີ່ບໍ່ເຄີຍເຫັນມາກ່ອນ ເຊິ່ງໜ້າຕາຂອງມັນກໍບໍ່ໄດ້ກ້ຽງງາມຄືມັນຝຣັ່ງທົ່ວໄປ.
ລາຍການກິນເນັດບຸກ (Guinness World Records) ໃນປັດຈຸບັນໄດ້ຍົກໃຫ້ “ມອນສເຕີ” ມັນຝຣັ່ງຍັກທີ່ຄົ້ນພົບໃນປີ 2011 ຈາກອັງກິດ ເປັນມັນຝຣັ່ງທີ່ມີນໍ້າໜັກສູງສຸດຂອງໂລກ ຂະນະທີ່ໜັກພຽງ 11 ປອນ ຫຼື 4.9 ກິໂລກຼາມເທົ່ານັ້ນ ເຊິ່ງເຊື່ອວ່າ “ດັ໊ກ” ຈະຄອງແຊັມມັນຝຣັ່ງໃຫຍ່ສຸດຂອງໂລກທີ່ບັນທຶກໂດຍ ກິນເນັດບຸກ ໃນບໍ່ຊ້ານີ້.