Daily Mail ລາຍງານ: ສະຫະຣາຊະອານາຈັກອັງກິດກາຍເປັນປະເທດທຳອິດຂອງໂລກ ທີ່ອະນຸມັດໃຊ້ຢາປົວພະຍາດໂຄວິດ-19 ຂອງບໍລິສັດເມິກຄ໌, ສະຫະລັດອາເມລິກາ ເນື່ອງຈາກຢາຊະນິດດັ່ງກ່າວສາມາດຊ່ວຍຫຼຸດຜ່ອນຄວາມສ່ຽງຂອງການເຈັບປ່ວຍຮຸນແຮງກັບຜູ້ຕິດເຊື້ອທີ່ມີພູມຄຸ້ມກັນຕໍ່າ ລວມທັງຜູ້ສູງອາຍຸໄດ້ 50%.

ທ່ານ ຊາຈິດ ຈາວິດ, ລັດຖະມົນຕີກະຊວງສາທາລະນະສຸກຂອງອັງກິດກ່າວວ່າ ລັດຖະບານໄດ້ສັ່ງຊື້ຢາ ໂມລນູພິຣາເວຍ ຈຳນວນ 480,000 ໂດສ ລວມລາຄາປະມານ 250 ລ້ານປອນ ທັງຢໍ້າຕື່ມວ່າ ການປິ່ນປົວພະຍາດໂຄວິດດ້ວຍຢາຕ້ານໄວຣັສດັ່ງກ່າວ ຖືເປັນ “ຕົວປ່ຽນ” ສຳລັບຜູ້ທີ່ມີສຸຂະພາບອ່ອນເພຍ ແລະພູມຄຸ້ມກັນຕໍ່າ ເຊິ່ງມີຄວາມສ່ຽງທີ່ຈະຕິດເຊື້ອໂຄວິດ ເຖິງແມ່ນຈະສັກວັກຊີນຄົບແລ້ວກໍຕາມ.

ຢາຕ້ານໄວຣັສ ໂມລນູພິຣາເວຍ (Molnupiravir) ໄດ້ຮັບການຜະລິດເພື່ອນຳໃຊ້ເປັນຢາຕ້ານພະຍາດໂຄວິດ-19 ຈາກບໍລິສັດເມິກຄ໌ ຂອງສະຫະລັດ ໄດ້ສະແດງໃຫ້ເຫັນຜ່ານການທົດລອງທາງຄລີນິກ ເພື່ອລົດຄວາມສ່ຽງໃນການປິ່ນປົວຜູ້ຕິດເຊື້ອໃນໂຮງໝໍໃນອັງກິດ ເຊິ່ງເຄິ່ງໜຶ່ງຂອງຈຳນວນຜູ້ປ່ວຍແມ່ນກຸ່ມຄົນທີ່ມີພະຍາດປະຈຳໂຕ ແລະ ຜູ້ສູງອາຍຸ.