ພະນົມເປັນ (ຣອຍເຕີ) ລາຍງານ: ນາຍົກລັດຖະມົນຕີກຳປູເຈຍ, ທ່ານ ຮຸນເຊນ ໄດ້ປະກາດໃນວັນທີ 1 ພະຈິກ ຜ່ານມາວ່າ ລັດຖະບານກຽມພ້ອມເປີດປະເທດອີກຄັ້ງໃນຕົ້ນເດືອນນີ້ ແລະພ້ອມສຳລັບວິຖີຊີວິດໃໝ່ ໂດຍບັນລຸເປົ້າໝາຍການສັກວັກຊີນປ້ອງກັນໂຄວິດ-19 ທັງໄດ້ຮັບການບັນທຶກອັດຕາການສີດວັກຊີນສູງສຸດແຫ່ງໜຶ່ງຂອງອາຊີ.

ປັດຈຸບັນເກືອບ 86% ໃນຈຳນວນປະຊາກອນທັງໝົດ 16 ລ້ານກວ່າຄົນຂອງກຳປູເຈຍໄດ້ຮັບການສັກວັກຊີນ, ຂະນະທີ່ 2 ລ້ານຄົນໄດ້ຮັບວັກຊີນກະຕຸ້ນ ແລະເດັກນັກຮຽນອາຍຸ 5 ປີ ກໍໄດ້ຮັບການສີດວັກຊີນແລ້ວ 3 ແສນຄົນ ເຊິ່ງມີອັດຕາສ່ວນໃກ້ຄຽງກັບສິງກະໂປ. ພ້ອມກັນນັ້ນ, ລັດຖະບານກໍມີວັກຊີນປ້ອງກັນໂຄວິດຈຳນວນ 10 ລ້ານໂດສໂດຍຈະໃຊ້ສັກກະຕຸ້ນເຂັມທີສາມ ພ້ອມກຳລັງສັ່ງຊື້ເພີ່ມອີກຈຳນວນໜຶ່ງ.

ທ່ານ ຮຸນເຊນ ກ່າວວ່າ: ກຳປູເຈຍຈະບໍ່ໄດ້ລີ້ຢູ່ໃນຖໍ້າອີກຕໍ່ໄປ ເຊິ່ງນັບຈາກນີ້ເປັນຕົ້ນໄປ ຈະມີການເປີດປະເທດຢ່າງເຕັມຮູບແບບໃນທຸກພື້ນທີ່ ແລະການໃຊ້ຊີວິດຮ່ວມກັບໂຄວິດ-19 ໃນວິຖີຮູບແບບໃໝ່.