ເວັບໄຊ Khmer Times ລາຍງານ: ໃນທ້າຍອາທິດຜ່ານມາ ເຈົ້າໜ້າທີ່ຕຳຫຼວດແຂວງເກາະກົງ, ກຳປູເຈຍ ໄດ້ຢຶດຢາເສບຕິດປະເພດເຮໂຣອິນ, ນໍ້າໜັກກວ່າ 200 ກິໂລກຼາມ ເຊິ່ງຂົນສົ່ງທາງນໍ້າຈາກປະເທດຕົ້ນທາງເຊັ່ນ: ລາວ ເພື່ອສົ່ງຜ່ານໄປຍັງປະເທດໄທ.
ເຈົ້າໜ້າທີ່ຕຳຫຼວດກຳປູເຈຍກ່າວວ່າ ຈຳນວນຢາເສບຕິດດັ່ງກ່າວຖືກຢຶດໄດ້ໃນເມືອງ ສະຣະ ອຳເບລ, ແຂວງເກາະກົງ ໂດຍມີການຂົນສົ່ງດ້ວຍເຮືອບັນທຸກສິນຄ້າ ຂະນະທີ່ການສືບສວນ-ສອບສວນໄດ້ດຳເນີນເປັນເວລາສາມວັນ ພ້ອມເປີດເຜີຍວ່າ ຢາເສບຕິດຈຳນວນດັ່ງກ່າວແມ່ນຂົນສົ່ງມາຈາກ ສປປ ລາວ ໂດຍມີປາຍທາງສົ່ງໄປປະເທດໄທ.
ເຈົ້າໜ້າທີ່ສາມາດຈັບກຸມຜູ້ຕ້ອງສົງໄສທັງໝົດ 6 ຄົນ ໃນນັ້ນມີຫົວໜ້າແກ໊ງສອງຄົນທີ່ເປັນຄົນໄທ, ທັງໝົດຖືກຕັ້ງຂໍ້ຫາຄ້າຢາເສບຕິດໃນສານແຂວງເກາະກົງ ພ້ອມຖືກຕັດສິນຈຳຄຸກເລີ່ມແຕ່ 20-30 ປີ ແລະປັບໄໝເລີ່ມແຕ່ 9,800 ໂດລາ ເຖິງ 24,000 ໂດລາສະຫະລັດ.