ແຫຼ່ງຂ່າວ The Verge ລາຍງານ: ສື່ສັງຄົມອອນໄລນ໌ຊັ້ນນຳເຊິ່ງເປັນທີ່ຮູ້ຈັກກັນດີໃນນາມ ເຟສບຸກຄ໌ (Facebook) ກຳລັງວາງແຜນປ່ຽນແປງພາບລັກຂອງຕົນດ້ວຍການຕັ້ງຊື່ກຸ່ມບໍລິສັດໃໝ່ ພາຍຫຼັງຖືກສອບສວນ ແລະວິພາກວິຈານຈາກພາກລັດຢ່າງຕໍ່ເນື່ອງ ໂດຍຈະມຸ່ງສູ່ການເປັນບໍລິສັດເມຕາເວີສ (Metaverse).

ການປ່ຽນແປງດັ່ງກ່າວຄາດວ່າຈະມີການປະກາດຢ່າງເປັນທາງການພາຍໃນອາທິດນີ້ ເຊິ່ງ ມາກ ຊັກເກີເບີກ ຜູ້ກໍ່ຕັ້ງເຟສບຸກຄ໌ ອາດຈະເປີດເຜີຍໃນກອງປະຊຸມປະຈຳປີຂອງບໍລິສັດ ໃນວັນທີ 28 ຕຸລາທີ່ຈະມາເຖິງ ເຊິ່ງການປ່ຽນແປງໂສມໜ້າໃໝ່ຂອງເຟສບຸກຄ໌ ຍັງສາມາດເຮັດໜ້າທີ່ແຍກໜ້າວຽກແຫ່ງອະນາຄົດທີ່ ມາກ ຊັກເກີເບີກ ໄດ້ມຸ່ງເນັ້ນໃສ່ການກວດສອບຢ່າງລະອຽດກ່ຽວກັບວິທີການເຮັດວຽກຂອງແພລດຟອມໂຊຊຽວມີເດຍໃນປັດຈຸບັນ.

ປັດຈຸບັນ ເຟສບຸກຄ໌ມີພະນັກງານ 10 ພັນກວ່າຄົນ ເຊິ່ງກຳລັງມຸ່ງພັດທະນາອຸປະກອນ AR ເພື່ອນຳພາບໍລິສັດກ້າວສູ່ຄວາມເປັນຈິງໃນໂລກເມຕາເວີສ ແລະຕ້ອງການເຮັດໃຫ້ອຸປະກອນ AR ລວມເຖິງ VR ເປັນອຸປະກອນທີ່ມີການໃຊ້ງານຢ່າງເປັນວົງກວ້າງ. ຢ່າງໃດກໍຕາມ, ມີຄວາມເປັນໄດ້ວ່າບັນດາບໍລິສັດທີ່ຢູ່ພາຍໃຕ້ການດູແລຂອງເຟສບຸກຄ໌ ເຊັ່ນ ອິນສຕາແກຣມ, ວອດແອັບ, ເມສເຊນເຈີ ແລະອຸປະກອນ VR ເຊັ່ນ Oculus ກໍຈະລວມຢູ່ໃນການປ່ຽນແປງຄັ້ງນີ້ນຳອີກ.