ບໍ່ວ່າຈະຂັບຂີ່ລົດຢູ່ໃສ ການໃສ່ໃຈ ແລະ ມີສະຕິຢູ່ສະເໝີຄືຄຸນສົມບັດຂອງນັກຂັບຂີ່ ເພາະການພາດ ຫຼື ລະສາຍຕາ ບໍ່ພຽງເທົ່າໃດວິນາທີ ສິ່ງທີ່ຕາມມາກໍຄືຄວາມເສຍຫາຍ ແລະ ອາດເຮັດໃຫ້ເຖິງແກ່ຄວາມຕາຍ. ສະນັ້ນ, ຕ້ອງມີສະຕິ ແລະແນມເບິ່ງຫົນທາງສະເໝີໃນຂະນະຂັບຂີ່.
ດັ່ງເຫດການນີ້! ອຸທາຫອນສຳລັບນັກຂັບຂີ່ລົດໃຫຍ່ ເມື່ອຄົນຂັບລົດເກ໋ງລາຍໜຶ່ງໃນປະເທດໄທ ມົວແຕ່ກົ້ມເກັບເຄື່ອງຂະນະຂັບເກ໋ງບີເອັມກ່ອນເສຍຫຼັກພຸ່ງເຂົ້າໃສ່ຂັ້ນໄດທາງຂຶ້ນ-ລົງສະຖານີບີທີເອັສແຫ່ງໜຶ່ງໃນກຸງເທບ.
ເຫດການດັ່ງກ່າວເກີດຂຶ້ນໃນວັນທີ 17 ຕຸລາຜ່ານມາ ຂະນະທີ່ຜູ້ຂັບລົດມົວແຕ່ກົ້ມເກັບເຄື່ອງໃນລົດທັງທີ່ລົດຍັງແລ່ນຢູ່ຕາມຖະໜົນ ເຮັດໃຫ້ເກີດເຫດການບໍ່ຄາດຝັນນີ້ຂຶ້ນ, ໂຊກດີບໍ່ມີໃຜໄດ້ຮັບບາດເຈັບ ຫຼື ເສຍຊີວິດຈາກຄວາມປະໝາດຂອງຜູ້ກ່ຽວ ສ່ວນຄົນຂັບແມ່ນບາດເຈັບເລັກນ້ອຍ.
ເບື້ອງຕົ້ນເຈົ້າໜ້າທີ່ມີຄວາມເຫັນວ່າ ອຸບັດເຫດຄັ້ງນີ້ເກີດຈາກຄວາມປະໝາດຂອງຄົນຂັບລົດ ພ້ອມແຈ້ງຂໍ້ຫາຂັບລົດໂດຍປະໝາດເປັນເຫດເຮັດໃຫ້ຊັບສິນຂອງຜູ້ອື່ນເສຍຫາຍ ພ້ອມຖືກປັບໄໝເບື້ອງຕົ້ນ 1.000 ບາດ (ສະກຸນເງິນໄທ) ພ້ອມນຳຄູ່ກໍລະນີໄປເຈລະຈາເລື່ອງຄວາມເສຍຫາຍຂອງຊັບສິນອື່ນໆຕໍ່ໄປ.
ຂໍ້ມູນຈາກ: ເວັບໄຊ ໄທຣັດ ອອນໄລນ໌