ວັນທີ 18 ຕຸລາ 2021 ສໍານັກຂ່າວ mgronline ລາຍງານວ່າ ລັດຖະບານສິງກະໂປ ເຄີຍໃຊ້ມາດຕະການປິດປະເທດ ລ໋ອກດາວ ລວມໄປເຖິງຕິດຕາມຜູ້ສໍາພັກໃກ້ຕິດຜູ້ຕິດເຊື້ອພະຍາດໂຄວິດ-19 ເພື່ອປ້ອງກັນການລະບາດ ແຕ່ເນື່ອງຈາກປັດຈຸບັນນີ້ ປະຊາກອນສິງກະໂປໄດ້ຮັບວັກຊີນຫຼາຍກວ່າ 80% ແລ້ວ ພາກລັດຈຶ່ງຫັນມາໃຫ້ຄວາມສໍາຄັນກັບການຜ່ອນຜັນຂໍ້ຈໍາກັດຕ່າງທ ເພື່ອຟື້ນຟູເສດຖະກິດ
ສິງກະໂປເລີ່ມເປີດໂຄງການ Travel lane ສໍາລັບຜູ້ເດີນທາງຈາກບຣູໄນ ແລະ ເຢຍລະມັນ ໃນເດືອນ ກັນຍາ ແລະ ວັນທີ 19 ຕຸລາ ນີ້ ຈະຂະຫຍາຍເພີ່ມອີກ 8 ປະເທດໄດ້ແກ່ ອັງກິດ, ການາດາ, ເດນມາກ, ຝຣັ່ງ, ເນເທີແລນ, ສະເປນ ແລະ ອາເມລິກາ, ສໍາລັບໂຄງການ Travel lane ສໍາລັບປະເທດເກົາຫຼີໃຕ້ຈະເລີ່ມໃນວັນທີ 15 ພະຈິກ 2021 ນີ້
ພາຍໃຕ້ໂຄງການນີ້ ຜູ້ເດີນທາງທີ່ສັກວັກຊີນປ້ອງກັນໂຄວິດ-19 ຄົບໂດສ ລວມເຖິງມີຜົນກວດໂຄວິດ-19 ເປັນ ລົບ ທັງກ່ອນການເດີນທາງ ແລະ ຂະນະທີ່ມາຮອດສິງກະໂປ ຈະໄດ້ຮັບອະນຸຍາດໃຫ້ເຂົ້າປະເທດໄດ້ໂດຍບໍ່ຕ້ອງກັກໂຕ
“ສິງກະໂປບໍ່ສາມາດລ໋ອກດາວ ແລະ ປິດປະເທດໄດ້ຕະຫຼອດໄປ ເຮົາຈໍາເປັນຕ້ອງເປີດເຂດແດນຢ່າງປອດໄພ, ບໍລິສັດ ແລະ ນັກລົງທຶນ ຈໍາເປັນຕ້ອງໃຊ້ສິງກະໂປເປັນຖານໃນການເຮັດທຸລະກິດທັງລະດັບພູມິພາກ ແລະ ລະດັບໂລກ ຄົນທີ່ເຮັດວຽກໃຫ້ບໍລິສັດເຫຼົ່ານີ້ກໍຈໍາເປັນຕ້ອງເດີນທາງເພື່ອຫາລ້ຽງຕົນເອງ” ນາຍົກລັດຖະມົນຕີ Lee Hsien Loong ກ່າວລະຫວ່າງທີ່ຊີ້ແຈງຍຸດທະສາດ ຢູ່ຮ່ວມກັບໂຄວິດ-19 ເມື່ອວັນທີ 9 ຕຸລາ 2021
Philip Koh ຮອງປະທານສະມາຄົມຂົນສົ່ງອາຫານອາກາດລະຫວ່າງປະເທດ (IATA) ປະຈໍາພູມິພາກອາຊີ-ປາຊີຟິກ ຊີ້ວ່າ ຄວາມສໍາເລັດຂອງສິງກະໂປໃນການເປີດຮັບຜູ້ເດີນທາງທີ່ສັກວັກຊີນຄົບ ບຸກຄົນເຫຼົ່ານີ້ຈະມີສ່ວນຊ່ວຍຟື້ນຟູອຸດສະຫະກໍາການບິນຂອງໂລກທີ່ໄດ້ຮັບຜົນກະທົບທີ່ຮຸນແຮງຈາກໂຄວິດ-19.