ແຫຼ່ງຂ່າວ Reuters ລາຍງານ: ນິວຊີແລນເລັ່ງສັກວັກຊີນໃຫ້ພົນລະເມືອງຂອງຕົນພຽງວັນດຽວ ເຖິງ 2.5% ຫຼື 124,669 ໂດສ ຂອງປະຊາກອນ 4.9 ລ້ານຄົນໃນມື້ວັນເສົາຜ່ານມາ ເຊິ່ງລັດຖະບານຕັ້ງເປົ້າສັກວັກຊີນໃຫ້ໄດ້ຢ່າງໜ້ອຍ 90% ຂອງພົນລະເມືອງ ຈິ່ງຈະສາມາດກັບມາໃຊ້ຊີວິດປົກກະຕິໄດ້.

ທີມງານແພດຂອງນິວຊີແລນມີການຈັດຕັ້ງຈຸດສັກວັກຊີນທົ່ວປະເທດ ລວມເຖິງຮ້ານອາຫານ, ສວນສາທາລະນະ ເຊິ່ງບາງແຫ່ງມີບໍລິການເຂົ້າໜົມຫວານນຳອີກ ເພື່ອກະຕຸ້ນການເຂົ້າເຖິງວັກຊີນຂອງປະຊາຊົນພ້ອມກຽມຈະໃຊ້ຊີວິດຮ່ວມກັບພະຍາດໂຄວິດ-19 ຂະນະທີ່ປະຊາກອນນິວຊີແລນຫຼາຍກວ່າ 62% ໄດ້ຮັບວັກຊີນຄົບສອງເຂັມ ແລະ 83% ໄດ້ຮັບວັກຊີນເຂັມທີໜຶ່ງ.

ສາຍພັນເດລຕ້າເລີ່ມລະບາດໃນນິວຊີແລນໃນຊ່ວງກາງເດືອນສິງຫາ ເຊິ່ງປະເທດດັ່ງກ່າວປອດໄວຣັສມາເປັນເວລາດົນຫຼາຍເດືອນໃນຊ່ວງຂອງການລະບາດໃຫຍ່ ເຮັດໃຫ້ໂອ໊ກແລນ ເມືອງທີ່ໃຫຍ່ສຸດຂອງປະເທດຍັງຄົງສືບຕໍ່ລັອກດາວຕື່ມອີກ 2 ອາທິດ ເຖິງແມ່ນຈະມີລາຍງານຍອດຜູ້ຕິດເຊື້ອໃໝ່ໃນປັດຈຸບັນໃນເມືອງດັ່ງກ່າວບໍ່ຮອດ 50 ຄົນຕໍ່ວັນກໍຕາມ ຂະນະທີ່ລັດຖະບານຕັ້ງເປົ້າຈະສັກວັກຊີນໃຫ້ປະຊາຊົນເຖິງ 90% ຈິ່ງຈະສາມາດຜ່ອນຜັນມາດຕະການລັອກດາວໄດ້.