ໃນວັນທີ 17 ຕຸລາຜ່ານມາ, ມີຊາຍຄົນໜຶ່ງເຂົ້າໄປລັກຕັດສາຍໄຟຟ້າຢູ່ເສັ້ນທາງລົດໄຟລາວ-ຈີນ ເຂດບ້ານແຈ້ງສະຫວ່າງ, ເມືອງນາຊາຍທອງ, ນະຄອນຫຼວງວຽງຈັນ ເຮັດໃຫ້ຖືກໄຟຊ໋ອດເສຍຊີວິດຄາທີ່.

ທີມງານບໍລິສັດທາງລົດໄຟລາວ-ຈີນຫາກໍອອກແຈ້ງການໃໝ່ໆໝາດໆໃນໜ້າເພດຈ໌ Laos – China Railway Company Limited ເລື່ອງການປ່ອຍກະແສໄຟຟ້າແຮງສູງເພື່ອໃຊ້ໃນການຕິດຕັ້ງ, ທົດລອງອຸປະກອນ ແລະທົດລອງແລ່ນລົດໄຟ ເຊິ່ງຈະພາໃຫ້ສາຍໄຟ ແລະອຸປະກອນຕ່າງໆທີ່ເຊື່ອມຕໍ່ກັບທາງລົດໄຟທັງໝົດມີການຊັກນໍາໄຟຟ້າ, ໂດຍສະເພາະແມ່ນລະບົບສາຍສົ່ງໄຟຟ້າເໜືອຫົວ ເຊິ່ງມີການຊັກນຳໄຟຟ້າແຮງສູງເຖິງ 27.5 KV ແລະມີຄວາມອັນຕະລາຍສູງ, ຖ້າໃຜສຳຜັດພຽງແຕ່ 3-4 ວິນາທີກໍອາດເຮັດໃຫ້ເສຍຊີວິດໄດ້ທັນທີ.

ຢ່າງໃດກໍຕາມ, ເຄື່ອງອຸປະກອນໄຟຟ້າຂອງທາງລົດໄຟລາວ-ຈີນ ເລີ່ມມີການຊັກນໍາໄຟຟ້າມາແຕ່ເດືອນສິງຫາ 2021, ສ່ວນລະບົບຈ່າຍໄຟເໜືອຫົວ ແມ່ນໄດ້ເລີ່ມຊັກນໍາໄຟຟ້ານັບແຕ່ ວັນທີ 16 ຕຸລາ ເຊິ່ງທາງການທີ່ກ່ຽວຂ້ອງກໍໄດ້ແຈ້ງເຕືອນປະຊາຊົນທີ່ອາໄສຢູ່ຕາມແລວທາງລົດໄຟດັ່ງກ່າວ ໃຫ້ມີສະຕິ, ລະມັດລະວັງຕົວ, ຫ້າມບໍ່ໃຫ້ເຂົ້າໃກ້ບໍລິເວນທາງລົດໄຟໃນໄລຍະ 2 ແມັດເດັດຂາດ.